“Sosial şəbəkələrin gənclərin həyatında rolu: müsbət və mənfi tərəfləri” mövzusunda interaktiv seminar keçirildi
Dövlət Təhlükəsizliyi Xidmətinin (DTX) Heydər Əliyev adına Akademiyası Bakı şəhərinin orta ümumtəhsil müəssisələrinin 10 və 11-ci sinif şagirdləri üçün “Sosial şəbəkələrin gənclərin həyatında rolu: müsbət və mənfi tərəfləri” mövzusunda interaktiv seminarlarını davam etdirir. Seminarların məqsədi Azərbaycan Respublikasının Prezidenti cənab İlham Əliyevin və birinci xanım Mehriban Əliyevanın gənclərin vətənpərvərlik, dövlətçiliyə sədaqət, milli-mənəvi dəyərlərin və əxlaqi irsin qorunması ruhunda tərbiyəsi, onların tolerantlıq mədəniyyətinin inkişaf etdirilməsi və ictimai maarifləndirilməsi üzrə tapşırıqlarının həyata keçirilməsidir.
Bu məqsədlə 24.10.2019-cu il tarixdə növbəti seminar Təhsil Nazirliyinin və Nəsimi Rayon İcra Hakimiyyətinin dəstəyi ilə Nəsimi rayonunun iyirmi altı orta ümumtəhsil məktəb və liseylərin şagirdləri üçün təşkil olundu. Məktəbin X sinif şagirdi Həsənzadə Ayla,XI sinif şagirdləri Məmmədov Riyad və Nuriyeva Əminə seminarda iştirak etdilər.
İştirakçılar əvvəlcə Ulu Öndər Heydər Əliyevin zəngin və mənalı həyat yolunu əks etdirən “Şöhrət” muzeyi ilə tanış oldular. Seminarda şagirdlərə sosial şəbəkələrin müsbət və mənfi tərəfləri, habelə gənclərin asudə və qiymətli vaxtlarının daha çox “virtual dünya”ya sərf etməsinin real həyatdan uzaqlaşmağa gətirib çıxarmasının psixoloji fəsadları və milli genofonda doğurduğu təhlükələr barədə interaktiv diskussiyalar aparıldı.
Sonda tədbir iştirakçılarına “Sosial şəbəkələrin gənclərin həyatında rolu” adlı videoçarx nümayiş olundu.
