İnsanlar anadan olanda qəhrəman kimi doğulmurlar. Vətənə, anaya, torpağa olan sevgi onları qəhrəmana çevirir. Belə qəhrəmanlardan biri də bu gün məktəbimizin adını daşıdığı, hər gün səhər-səhər məktəb həyətində büstünə ehtiramla baş əyib keçdiyimiz Nazim Məhərrəm oğlu Rəfiyevdir.
Nazim Məhərrəm oğlu Rəfiyev 1967-ci il may ayının 25-də Bakı şəhərində anadan olub. Ailədə dörd qardaş böyüyürdü və bu qardaşların ən böyüyü Nazim idi. Nazim şən, mehriban və eyni zamanda bir qədər dəcəl idi. Nazim 1973-cü ildə 104nömrəli məktəbin birinci sinfinə qədəm qoyur. Məktəb həyatı Nazimi mərd, cəsur, vətənpərvər, müəllimlərini sevən bir şagird kimi püxtələşdirir. O, 1984-cü ildə orta məktəbi bitirir. 1985-ci il Nazimin həyatında əsl kişilik məktəbinə qədəm qoyduğu il kimi yadda qalır. Belə ki, o, ordu sıralarına çağırılır. Əfqanıstanda hərbi xidmət çəkən Nazim şücaəti, qorxmazlığı ilə komandanlığın diqqətini çəkir, amma amansiz ölüm onu həyatdan vaxtsiz aparır.
Nazim 1987-ci ildə düşmən gülləsinə tuş gələrək qəhrəmancasına həlak olur və şəhidlik zirvəsinə yüksəlir. O, hələ sağ ikən müxtəlif təltif və ordenlərə layiq görülmüşdü. Ona “Xidmətə görə şöhrət ordeni” təqdim edilmişdir. Ölümündən sonra isə Nazim “Qırmızı ulduz ” ordeninə və “Əfqanıstanda xidmət ordeni ”nə layiq görülüb.
Qəhrəmanın xatirəsi bu gün də hamı tərəfindən yad edilir. Biz onun müqəddəs ruhu qarşısında baş əyirik.