Yay düşərgəsi
Azərbaycan Respublikasının Gənclər Fondunun maliyyə yardımı ilə "Oriqami" uşaq və yeniyetmələr ictimai birliyi tərəfindən Qusar rayonu Yasab kəndində "Şən yay-2019 " layihəsi icra olunmuşdur. Layihəyə 15 avqust 2019-cu il tarixində başlanmışdır. "Şən yay-2019 " layihəsi 15 noyabr 2019-cu ildə başa çatır. "Şən yay-2019 "layihəsində Sabunçu rayonunun və Qusar rayonu Yasab kəndinin məktəbliləri birgə iştirak edərək dincəlmişlər.
Sabunçu rayonundan "Şən yay-2019 " layihəsində Maştağa qəsəbəsi 255 №-li tam orta məktəbin bir qrup X sinif şagirdləri Əhmədzadə Cəmaləddin, Mehdiyev Rəşad, Quliyev Qəzənfər, Cəfərov Vaqif , Bağırov Orxan, Cəlilov Miralim, Həsənov Müzəffər, Rəcəbli Mövsüm fəal iştirak etmişlər. Gənclər, istirahət günlərində, Qusar rayonu Yasab kəndinin ətraf meşələrinə, "Qara Baba" Pirinə,qədim Alban məbədinə ,fəvvarəyə, bulaqlara, taxıl zəmilərinə, moruqluğa maraqlı ekskursiyalar etmiş, futbol, voleybol, basketbol,” Çarpaz qollar”, “Hədəfi seç” mütəhərrik idman oyunlarında, komanda yarışlarında həvəslə iştirak etmışlər. “Oriqami” təşkilatının sərəncamında olan " Yol hərəkəti " oyun dəsti vasitəsilə istirahət edən hər bir gənc rollu-situativ oyunda aktiv iştirak edərək yolu keçərkən təhlükəsiz yol hərəkəti qaydalarına ciddi əməl olunması və onlara riayət edilməsini qurulmuş dekorasiyada canlı nümayiş etdirmişlər.
“Oriqami” təşkilatı uşaqların Qusar rayonunda yay istirahətini səmərəli, təhlükəsiz, daha maraqlı etmək məqsədi ilə yerli idarəetmə strukturları- qəsəbə Nümayəndəliyi, Bələdiyyə, kənd klubu, tibb məntəqəsi ilə sıx əlaqələr qurmuş və birgə tədbirlər həyata keçirmişdir. Düşərgədə dincələn gənclər ilə yerli yeniyetmələr arasında mehriban münasibətlər qurulmuş , bir neçə fərdi oyun və komanda idman yarışları keçirilmişdir.
Qusar rayonu İcra Hakimiyyəti Başçısının Yasab kənd İnzibati Ərazi Dairəsi üzrə Nümayəndəsi Asəf Quliyev, Yasab kənd Bələdiyyəsinin sədri İlkin Şəfiyev tez-tez düşərgəyə gələrək uşaq və yeniyetmələrin istirahəti ilə maraqlanmışlar.Yasab kənd klubu uşaqlar üçün səyyar kitabxana təşkil etmiş, Xaçmaz Mədəniyyət Evi isə düşərgədə 2 dəfə konsert təşkil etmişdir. Gənclərin rasional və yüksək kalorili qidalanmasına həmişə diqqət yetirilmişdir. Aşbaz Sevil xala uşaqlara ləzgi lavaşı, çox ləzzətli və dadlı yeməklər bişirmişdir. 2019-cu ilin yay mövsümü yeniyetmələrin, gənclərin xatirində həmişə qalacaqdır.
“Oriqami” uşaq və yeniyetmələr ictimai birliyi 2019-cu ilin yay mövsümündə gənclərə qayğısız, fərəhli günlər yaşatdığına, onlar üçün gözəl yay istirahətinin təşkilinə görə Azərbaycan Respublikasının Gənclər Fonduna, Qusar rayonu RİH-nin Yasab kənd İƏD-üzrə Nümayəndəliyinə, Sabunçu rayonu Maştağa qəsəbəsi 255 № li məktəbin müdiriyyətinə minnətdarlığıını bildirir.