“Şahinlər” hərbi-idman oyunları üzrə rayon birinciliyi keçirildi
16 aprel 2016-ci il tarixində Heydər Əliyev adına Azərbaycan Ali Hərbi məktəbində Xətai rayon orta ümumtəhsil məktəblərinin şagirdlərinin iştirakı ilə “Şahin” hərbi-idman oyununun rayon mərhələsi keçirildi. Tədbirin keçirilməsində məqsəd məktəblilərin hərbi xidmətə hazırlıq səviyyəsinin yüksəldilməsi, yeniyetmə və gənclərdə vətənpərvərlik və vətəndaşlıq tərbiyəsi aşılamaq olmuşdur. Xətai Rayon İcra Hakimiyyətinin və Rayon Gənclər və İdman İdarəsinin təşəbüssü və təşkilatçılığı ilə keçirilən ”Şahin” hərbi-idman oyunu dövlət himnin səsləndirilməsi ilə başladı. Xətai Rayon İcra Hakimiyyətinin humanitar məsələlər üzrə müavini Jalə Abdiyeva tədbiri giriş sözü ilə açaraq qeyd etdi ki, bu cür yarışların keçirilməsində əsas məqsəd yetişməkdə olan gənc nəslin hərbi vətənpərvərlik tərbiyyəsinə diqqqət və qayğının daha da artırılması, həmçinin məktəb şagirdlərini hərbi-idman oyunlarına geniş cəlb etməklə onların ordu sıralarında xidmətə hazırlığa köməkliyin göstərilməsidir. Daha sonra Xətai rayonu üzrə 38 məktəbin 532 şagirdi arasında keçirilən hərbi-idman yarışlarına start verildi. Əvvəlcə hər biri 14 nəfərdən ibarət komandalar təntənəli marşla və musiqi ilə tribuna önündən keçdilər. Yarışa qatılan 8-10-cu sinif şagirdləri yarışın 8 mərhələsi üzrə öz qüvvələrini sınadılar.
