“Gərək nəbzin Vətənin nəbzi ilə vursun” adlı tədbir keçirildi
24 may 2019-cu il tarixində Zaur Məmmədov adına 171 nömrəli tam orta məktəbdə 28 May Respublika Günü ilə əlaqədar olaraq “Gərək nəbzin Vətənin nəbzi ilə vursun” adlı tədbir keçirildi.
Tədbirdən öncə qonaqlar məktəbdə 28 May Respublika Gününə həsr olunmuş sərgi ilə tanış oldular.
Tədbir Azərbaycan Respublikasının Dövlət Himninin oxunması ilə başladı. Azərbaycan Xalq Cümhuriyyətinin yaranmasına həsr olunmuş videoçarx nümayiş olundu.
Şagirdlər vətənpərvərliyə həsr olunmuş şeirlər söylədilər, mahnılar oxudular, müxtəlif rəqs nümunələri göstərdilər.
İbtidai sinif müəllimlərinin “Arşın mal alan” bədii filmindən təqdim etdikləri səhnəcik tədbir iştirakçıları tərəfindən alqışlarla qarşılandı.
Şagirdlərin “Baharın on yeddi anı” bədii filmindən götürülmüş səhnəciyin təqdimatı tədbir iştirakçıları tərəfindən maraqla qarşılandı.
Tədbirin fəxri qonağı Azərbaycanın detektiv yazıçısı, nasir, publisit, Azərbaycan Respublikasının Xalq Yazıçısı, Azərbaycan Yazıçılar Birliyinin Katibi Çingiz Abdullayev idi. O, şagirdlərin müxtəlif suallarını cavablandırdı, əsərlərindəki qəhrəmanlar haqqında məlumat verdi. Səmimi ab – havada davam edən görüşdə ədib həyatından maraqlı hadisələr, uşaqlıq illərindən xatirələri də məktəblilərlə bölüşdü, onlara Vətəni sevməyi, böyüklərə hörmət etmeyin vacibliyini çatdırdı. Şagirdlərə sevdiyi yazıçılar, ona dərs deyən müəllimlər haqqında da məlumat verdi. Şagirdlərə çoxlu elmi və bəddi əsərləri oxumağı və mütaliə etməyi tövsiyyə etdi. Sonda Xalq yazıçısı məktəbin kollektivi və şagirdlər üçün kitablarını imzaladı və onlarla xatirə şəkilləri çəkdirdi.
Milli Olimpiya Komitəsinin nümayəndəsi Ceyhun müəllim çıxış edərək bayram münasibətilə tədbir iştirakçılarını təbrik etdi. Olimpiya Mədəniyyəti və Təhsil Proqramı çərçivəsində məktəbdə görülmüş işlərdə və keçirilmiş tədbirlərdə fəal iştirak edən şagirdlərə sertifikatlar təqdim etdi.
Məktəbin direktoru Zemfira Məsiyeva çıxış edərək Respublika Günü münasibəti ilə təbrik etdi. Olimpiya Mədəniyyəti və Təhsil proqramı çərçivəsində görülmüş işlərə görə Zaur Məmmədov adına 171 nömrəli tam orta məktəbin aprel ayının qalibi olduğunu elan etdi.
Tədbirin sonuna şagirdlər Zaur Məmmmədov adına 171 nömrəli tam orta məktəbin himni oxudular.
Tədbirdə müəllimlər, şagirdlər, valideynlər və digər qonaqlar iştirak edirdi.
