Novruz bayramı münasibətilə sərgi təşkil olundu
Zaur Məmmədov adına 171 nömrəli tam orta məktəbdə Novruz bayramı münasibəti ilə bayram sərgisi təşkil olundu. Sərgidə hər bir sinif püşkatma yolu ilə Azərbaycan Respublikasının bir rayonuna, regionuna uyğun adət - ənənələrini özündə əks etdirən bayram süfrələri təşkil etdi. Həmin bölgələrə uyğun bayram yeməklərini, ərzaqları, geyimlərini, xalçalarını nümayiş etdirdilər.
Məktəbin direktoru Zemfira Məsiyeva və Bakı Şəhəri üzrə Təhsil İdarəsinin nümayəndəsi Fərman Abdullayev və qonaqlar Novruz bayramı münasibəti ilə təşkil olunmuş sərgi ilə yaxından tanış oldular. Milli geyimdə olan qızlar, oğlanlar, müəllimlər bayram süfrəsi ətrafında həmin bölgə haqqında, bayram adət-ənənələri haqqında, bayram təamları haqqında, ərzaqları haqqında, bayram xonçaları haqqında, bayram süfrələri haqqında ətraflı məlumat verdilər.
Sərgi ilə tanış olduqdan sonra məktəbin böyük akt zalında “Yurdumuza bahar gəlir” adlı bayram tədbiri keçirildi. Şagirdlər Novruz bayramı haqqında, Azərbaycan, Rus və İngilis dillərində ətraflı məlumat verdilər, mahnı oxudular, rəqs etdilər.
Novruz bayramının simvolu olan səməni ətrafında, milli birlik rəmzi olan yallı rəqsi ilə davam etdilər. Yallıda şagirdlər, müəllimlər, valideynlər, qonaqlar əl-ələ tutaraq rəqs etdilər. Bayram tədbirini Azərbaycan Respublikasının Əməkdar artisti Zaur Əmiraslanov öz mahnıları ilə daha da canlandırdı.
Tədbir iştirakçıları məktəbin həyətində rəqs etdilər və havaya rəngbərəng şarlar uçurdular.
