Xocalı Soyqırımının 27-ci ildönümü ilə əlaqədar olaraq təqdimatların dinlənilməsi keçirildi
Doğma yurdlarından didərgin düşmüş və Azərbaycanın 48 rayonuna səpələnmiş Xocalı sakinləri Dağlıq Qarabağ münaqişəsinin ədalətli həlli, Ermənistanın Azərbaycana qarşı təcavüzünün dəf edilməsi, ölkənin ərazi bütövlüyünün bərpa edilməsi ümidi ilə yaşayırlar. Onlar dünya xalqlarına, dövlətlərinə, beynəlxalq təşkilatlara haqq-ədaləti və həqiqəti müdafiə etmək, Xocalıda törədilmiş terrorizm, etnik təmizləmə faktlarını pisləmək barədə müraciətlər edirlər.
Xocalı soyqırımının günahkarları, təşkilatçıları və icraçıları layiqli cəzalarına çatmalıdırlar. Cinayət cəzasız qala bilməz. Təəssüf ki, XX əsrdə soyqırım və etnik təmizləmə hadisələri baş vermiş tarixi səhifələr olmuşdur. Xocalı faciəsi onların sırasında ən dəhşətlilərinə aiddir. Hal-hazırda bu hadisələrdə hər hansı şəkildə iştirakı olmuş şəxslər hələlik öz vicdanları qarşısında cavabdehdirlər, ancaq vaxt gələcək və onlar tarixin məhkəməsi qarşısında cavab verməli olacaqlar.
22 fevral 2019-cu il tarixində Z.Məmmədov adına 171 nömrəli məktəbdə tarix fənni üzrə metodbirləşmə rəhbəri Həcər Əlişova 5c, 6b, 6a sinif şagirdləri arasında Xocalı soyqırımı qurbanlarına həsr olunmuş təqdimat keçirdi. Təqimatda şagirdlər Xocalının coğrafi ərazisi, əhalisi, tarixi, faciənin baş verdiyi tarixi şərait haqqında ətraflı məlumat toplamış və onu təqdimat formasında nümayiş etdirmişdilər.
