Azərbaycanın Milli Qəhrəmanı Mübariz İbrahimovun doğum günü ilə əlaqədar olaraq guşənin açılışı oldu
Zaur Məmmədov adına 171 nömrəli tam orta məktəbdə Azərbaycan Respublikasının Milli Qəhrəmanı Mübariz İbrahimovun doğum günü münasibətilə məktəbdə yaradılmış guşənin açılışı oldu. Guşənin yaradılması təşəbbüsünü həyata keçirən məktəbin hərbi rəhbəri Azər Xankişiyev oldu. Dəhlizdə yaradılmış hərbi vətənpərvərlik görünüşü şagirdlərdə böyük ruh yüksəkliyi yaratdı. Tədbir ilk olaraq Azərbaycan Respublikasının Dövlət Himninin səslənməsi ilə başlandı. Vətən uğrunda canlarından keçmiş bütün şəhidlərin ruhu bir dəqiqəlik sükutla yad edildi. Məktəbin tarix müəllimi Ülvi Quliyev Azərbaycanın Milli Qəhrəmanı Mübariz İbrahimovun keçdiyi şərəfli həyat yolu, göstərdiyi şücaət haqqında ətraflı məlumat verdi. Məktəbin hərbi rəhbəri Azər Xankişiyev 2010-cu il iyunun 18-də döyüş növbəsini yerinə yetirərkən düşmən qüvvələrinin atəşkəs rejimini pozması nəticəsində Talış – Borsunlu istiqamətində gedən şiddətli döyüş zamanı şəxsi rəşadət və şücaət nümayiş etdirmiş, düşmənin çoxlu sayda canlı qüvvəsini məhv edərək şəhid olmuş Azərbaycan Respublikası Silahlı Qüvvələrinin giziri, Azərbaycanın Milli Qəhrəmanı Mübariz Ağakərim oğlu İbrahimov haqqında çıxış etdi. Şagirdlərin ifasında vətənpərvər mahnılar, Azərbaycanın Milli Qəhrəmanı Mübariz İbrahimova həsr olunmuş şeirlər səsləndirildi. Azərbaycanın Milli Qəhrəmanı Mübariz İbrahimovun qəhrəmanlığından, göstərdiyi şücaətdən, vətənə olan məhəbbətdən danışan təlim – tərbiyə işləri üzrə direktor müavini Sima Əhmədova, Azərbaycan dili və ədəbiyyat müəllimi Afaq İmamverdiyeva, ingilis dili müəllimi Yeganə Səlimova şagirdlərə belə vətənpərvər qəhrəmanlardan örnək götürməyi tövsiyə etdilər. Sonda çıxış edən məktəbin direktoru Zemfira Məsiyeva Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Vətən uğurunda şəhid olmuş oğul və qızlarımıza göstərdiyi qayğı və diqqəti önə çəkərək qələbə gününün çox da uzaqda olmadığını bildirdi. Tədbirdə iştirak edən valideynlər məktəbdə vətənpərvəliklə bağlı təşkil edilən tədbirlərin, görülən işlərin şagirdlərdə böyük ruh yüksəkliyi oyatdığını qeyd edərək, məktəb rəhbərliyinə və müəllimlərə minnətdarlıqlarını bildirdilər. Sonda Azərbaycanın Milli Qəhrəmanı Mübariz İbrahimovun guşəsi önünüdə xatirə şəkli çəkdirildi. Tədbirdə müəllimlər, şagirdlər, valideynlər və əvvəlki illərin məzunları iştirak edirdilər.
