"Əlifba bayramı"
Məktəb həyatının pillələrində şagirdlərin ilk bayramı olan “Əlifba bayramı” uşaqların yaddaşında həmişəlik qalan bayramlardan biridir. Zaur Məmmədov adına 171 saylı tam orta məktəbin rus bölməsi olan 1 “d” sinif şagirdləri və onların sinif rəhbəri Natalya Şərifovanın 26 may 2018-ci il tarixində keçirdikləri “Əlifba bayramı” da həmişəlik onların yaddaşına yazıldı. Tədbir ilkin olaraq Azərbaycan Respublikasının Dövlət Himninin oxunması və Respublika gününə hasr olunmuş şeirlərlə başladı. Valideynlərin də iştirak etdikləri tədbirdə 1 “d” sinif şagirdləri müxtəlif səhnəciklərlə bayrama rəng qatdılar. "Meşənin məktəbi", "Üç dost", "Pərilər" və "Məktəb ləvazimatları" adlı mini səhnəciklər şagirdlər tərəfindən nümayiş olundu. Müxtəlif rəqslər və mahnılarla zəngin olan “Əlifba bayramı”nın sonunda sinif rəhbəri Natalya Şərifova 1-ci sinifi bitirmə haqqında diplomları şagirdlərə təqdim etdi və onlara can sağlığı, gələcək dərs illərində müvəffəqiyyətlər və Vətənini sevib hər bir zaman onu qoruyan layiqli övladları olmalarını arzuladı.
