171 №-Lİ TAM ORTA MƏKTƏB

19 yanvar 2017 -ci il tarixində Xətai rayonu Zaur Məmmədov adına 171 saylı tam orta məktəbin 8 e sinfində ilk dərs 20 yanvar faciəsinin iyirmi yeddinci il dönümünə həsr edilmişdir. Dərs başlanan kimi ilk olaraq şagirdlər xalqımızın azadlığı uğrunda canlarını qurban vermiş qəhrəman Vətən övladlarının xatirəsini bir dəqiqəlik sükutla yad etmişlər. Daha sonar 8e sinfinin rəhbəri Sevic Əbilova şagirdlərə 20 Yanvar 1990 cı il Qanlı Yanvar haqqında qısa məlumat vermişdir. O bildirmişdir ki, Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 1990-cı ilin 20 Yanvarında ölkəmizə qarşı ərazi iddiaları irəli sürən Ermənistanın təcavüzkar hərəkətlərindən və keçmiş SSRİ rəhbərliyinin onlara havadarlığından hiddətlənən, Bakının küçələrinə və meydanlarına çıxaraq buna öz qəti etirazını bildirən geniş xalq kütlələrinə qarşı sovet ordusunun döyüş hissələrinin yeridilməsi Azərbaycanda misli görünməmiş faciəyə gətirib çıxardı. Həmin faciəli günlərdə öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucaldılar. Böyük itkilərlə, günahsız insanların qətli ilə nəticələnən 20 Yanvar faciəsi Qorbaçov başda olmaqla cinayətkar imperiya rəhbərliyinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan xalqımızın həm də mübarizliyini, əyilməzliyini, məğrurluğunu nümayiş etdirdi. Məhz bunun nəticəsində uzun illərdən bəri arzusunda olduğumuz müstəqilliyə qovuşduq və ölkəmiz suverenlik əldə etdi. Bu qanlı hadisələrdən illər keçməsinə baxmayaraq, xalqımız o müdhiş gecəni daim xatırlayır, bu faciəni törədənlərə öz dərin nifrətini bildirir. Xalqımızın qan yaddaşında əbədi yaşayacaq 20 Yanvar faciəsini respublikamız hər il ümumxalq hüzn günü kimi geniş qeyd edir.Yekunda şagirdlər 20 yanvar faciəsi, həmçinin şəhidlər barədə şerlər demiş və gətirdiyi tər qərənfilləri məktəbin adını daşıdığı Zaur Məmmədovun baralyefi önünə düzmüşlər.