“20 Yanvar-qəhrəmanlıq-milli qürur dastanı” adlı öyrədici və müzakirə xarakterli “Açıq dərs” keçirildi
19 yanvar 2022-ci il tarixində Bakı şəhəri Xətai rayonu Zaur Məmmədov adına 171 nömrəli tam orta məktəbdə “20 Yanvar-qəhrəmanlıq-milli qürur dastanı” adlı öyrədici və müzakirə xarakterli “Açıq dərs” keçirildi. 8a və 6c sinfinin şagirdləri ilə təşkil olunmuş dərsdə Bakı Şəhəri üzrə Təhsil İdarəsnin Əməkdaşı Şəhanə Bağırova, məktəbin direktoru Zemfira Məsiyeva, təlim - tərbiyə işləri üzrə direktor müavini Sima Əhmədova, tərbiyə işləri üzrə direktor müavini Kənan İsmayılov, fənn müəllimləri və şagirdlər iştirak edirdi.
Tarix və ədəbiyyat fənninin inteqrasiyasından təşkil olunmuş dərs Azərbaycan Respublikasının Dövlət Himninin oxunamsı ilə başladı. Məktəbin tarix müəllimi Ülvi Quliyev və Azərbaycan dili və ədəbiyyat müəllimi Vəfa Nəzərova fənnlərarası əlaqəni qurmaqla şagirdlərə 20 Yanvar hadisələri haqqında məlumat verdilər.
20 Yanvar Azərbaycan tarixində təkcə faciə deyil, Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanış günüdür. Bu, uzun illər sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir. Bu tarix həm də kimin kim olduğunu sübut edən növbəti imtahan idi. 1990-cı il yanvarın 19-dan 20-nə keçən gecə Bakıda sovet ordusu tərəfindən dinc əhaliyə qarşı dəhşətli, kütləvi qırğın hadisəsi törədildi. Bu qanlı hadisənin törədilməsində əsas məqsədlərdən biri öz haqlı tələblərini irəli sürən, bu tələblərə demokratik yollarla nail olmaq istəyən, istiqlaliyyət, azadlıq, suverenlik istəyində olan Azərbaycan xalqının iradəsini qırmaq, insanların müstəqillik arzularını tankların tırtılları altında əzmək idi. Sovet imperiyası günahsız insanların qanını axıtsa da, xalqımıza qarşı misli görünməmiş qəddarlıq etsə də, istəyinə nail ola bilmədi, milli qürurumuzu qıra bilmədi.
Dərsdə 20 Yanvar hadisələri ilə bağlı video-çarxlar nümayiş etdirildi,şagirdlərin ifasında şeirlər dinlənildi,səhnəciklər göstərildi.
8a sinif şagirdi İnci Zəfər Gününə həsr etdiyi şeirini səsləndirdi. Eyni zamanda qanlı yanvar hadisələri şagirdlərlə müzakirə edildi.
Dərsin sonunda Bakı Şəhəri üzrə Təhsil İdarəsinin İnkişaf layihələri sektorunun məsləhətçisi Şahanə Bağırova və məktəbin direktoru Zemfira Məsiyeva 20 Yanvar hadisələri haqqında öz fikirlərini bildirərək dərsi dəyərləndirdi. İştirak edənlərə öz təşəkkürlərini bildirdilər.
