Zəfər günü ilə bağlı ingilis dili fənnindən "Açıq dərs" keçirildi
Sentyabrın 27-də Ermənistan silahlı birləşmələri böyük təxribat törətmək məqsədi ilə ərazilərimizə hücum etdi. Televiziyada Müdafiə Nazirliyinin rəsmi məlumatı yayımlandı: "Azərbaycan Ordusu bütün cəbhə boyu əks-hücum əməliyyatına başlayıb, düşmənə sarsıdıcı zərbələr endirir, şəhidlərimiz var...". Azərbaycan Ordusunun hissələri hücumun qarşısını qətiyyətlə aldı. Ali Baş Komandanın əmri ilə əks-hücum əməliyyatına başlanıldı. Bu əməliyyat Vətən müharibəsi kimi davam etdirildi.
Düşmən 44 günün sonunda diz çökdü, Cənubi Qafqaz erməni faşizminin zülmündən qurtardı. Azərbaycanın dövlət sərhədləri bərpa edildi.
Dekabrın 10-da Bakıda Zəfər paradı keçirildi. Azadlıq meydanında vüqarla addımlayan Azərbaycan ordusunun rəşadətli əsgərləri görənlərə unudulmaz anlar yaşatdı.
Zəfər bayramı hamımızın qürur mənbəyi oldu. 27 oktyabr 2021-ci il tarixdə məktəbin ingilis dili müəllimləri Cumayeva Nərgiz və Sadıqova Mehriban rəhbəri olduğu 9 b sinfində şərəfli gün münasibətilə “Zəfər bayramı” adlı “Açıq dərs” keçirdilər. Məktəbin direktoru Zemfira Məsiyeva, təlim – tərbiyə işləri üzrə direktor müavini Sima Əhmədova, tərbiyə işləri üzrə direktor müavini Kənan İsmayılov, fənn müəllimləri Sevinc Əbilova və Mahirə Nəsirova iştirak etdilər. Şagirdlərin ingilis dilində çıxışları, göstərilən videoçarx maraqla qarşılandı, şagirdlərin ifasında mahnı dinlənildi. Sonda müəllimlərin tədbirlə bağlı fikirləri bildirildi. Qürur hissi ilə keçirilən belə tədbirlərin axarlı olması vurğulandı.
