Qələbəni Sizə borcluyuq, əziz veteranlar!
09 may 2020-ci il tarixində respublikamızda da Faşizm üzərində qələbənin 75 illik yubileyi qeyd olundu.
1941-1945-ci illəri əhatə edən və tarixə Böyük Vətən Müharibəsi adı ilə daxil olan müharibəyə son verən bu qələbədə Azərbaycan xalqının igid oğul və qızlarının əməyi və qəhrəmanlıqları az olmamışdır
İki dəfə Sovet İttifaqı Qəhrəmanı Həzi Aslanov, Sovet İttifaqı Qəhrəmanları İsrafil Məmmədov, Aslan Vəzirov, Adil Quliyev, Ziya Bünyadov, Gəray Əsədov,Məlik Məhərrəmov, Mehdi Hüseynzadə, generallar Mahmud Əbilov, Tərlan Əliyarbəyov, Hacıbaba Zeynalov və bir çox başqaları öz şücaətləri ilə Xalqımızın tarixinə yeni səhifələr yazmışlar.
Zaur Məmmədov adına 171 nömrəli tam orta məktəbin kollektivinin bir neçə nümayəndəsi də 09 may 2020-ci il tarixində Xətai rayonunda yaşayan Böyük Vətən Müharibəsi iştirakçılarından iki veteranin - Nazim Tağı oğlu Ramazanovun və Anna Qardeyevna Xarikovskayanın ailəsində qonaq olmuşlar. Ziyarət çərçivəsində veteranlar keçdikləri müharibə yolundan, döyüş anlarından maraqlı hadisələr danışmış, Azərbaycan Respublikasının Prezidenti İlham Əliyevin rəhbərliyi ilə dövlətimiz tərəfindən veteranlara daim qayğı ilə yanaşılması, onların əməyinin hər zaman yüksək şəkildə qiymətləndirilərək müxtəlif mükafatlarla təltif edilməsi barədə söhbətlər aparılmışdır Veteranlar onlara göstərilən diqqət və qayğıya görə məktəb rəhbərliyinə və kollektivə minnətdarlıqlarını bildiriblər.
Qeyd edək ki, veteranlarla görüş ölkədə elan olunmuş karantin və sosial izolyasiya qaydalarına uyğun olaraq, zəruri təhlükəsizlik tədbirləri təmin edilməklə həyata keçirilib.
