"Şahinlər” komandasının üzvləri fəxri fərmanla təltif olundular
Yeniyetmə və gənc nəslin milli köklərimizə bağlılıq, vətənpərvərlik, dövlətçiliyə sədaqət ruhunda tərbiyə olunması işi peşəsindən asılı olmayaraq hər kəsin qarşısında duran ən ümdə vəzifələrdəndir. Bu yolda pedaqoji kollektivin də zəhməti böyükdür.
Məktəb həyatı dövründə müəllimlərin zəhməti və əzmkarlığı sayəsində gənclərimiz ilkin hərbi bilik və vərdişlərə yiyələnirlər.
Hansı peşədə çalışmasından asılı olmayaraq, gənclərimizin milli qürur hissinə sahib olan, dövlətçiliyimizi qoruyub saxlayan, Vətənini sevən, onun yolunda canından keçməyə hazır olan vətəndaşlar kimi formalaşmasında hər kəs bir olmalı, birgə fəaliyyət göstərməlidir
Ümumtəhsil məktəblərinin kollektivinin ən vacib vəzifələrindən bir də şagirdlərdə vətənpərvərlik hisslərinin aşılanmasıdır. Həmin sahədə həyata keçirilən kütləvi tədbirlər, maarifləndirmə və təbliğat işləri bilavasitə gənclərin mənəvi, fiziki, psixoloji hazırlığının təmin edilməsinə, onlarda Vətənə, doğma torpağa məhəbbət hissinin yüksəldilməsinə, eləcə də müasir dünyamızda qloballaşmanın geniş vüsət aldığı bir zamanda milli-mənəvi dəyərlərin qorunub saxlanmasına yönəldilir.
Gənclərə hərbi vətənpərvərlik və milli-mənəvi dəyərlərin təbliğinə yardımçı olmaq məqsədilə məktəb şagirdləri ilə kompleks tədbirlər həyata keçirilməlidir. Silsilə tədbirlərdə, məktəblilər arasında hərbi vətənpərvərlik, milli-mənəvi şüurun təbliği və aşılanması işinin ən yüksək səviyyəyə çatdırılmasında belə tədbirlərin çox böyük əhəmiyyəti var
Xətai rayonu Zaur Məmmədov adına 171 nömrəli tam orta məktəbin komandasının tərkibində hərbi idman yarışlarında iştirak edən şagirdlərimiz də bu istiqamətdə çox uğular qazanıblar. Hər hərbi idman yarışlarında müəyyənuğur qazanan şagirdlərimizin sonuncu uğuru 25 fevral 2020-ci il tarixində Bakı şəhəri məktəbliləri arasında keçirilən «Mahir nişançı» güllə atıcılığı yarışında birinci yerə layiq görülmələri olmuşdur. Məktəbdə və rayon üzrə keçirilən hərbi vətənpərvərlik yarışlarında məktəbimizi layiqincə təmsil edən bir neçə şagirdimiz «Faşizm üzərində Qələbə»nin 75 illik yubileyi münasibətilə məktəb rəhbərliyi tərəfindən Fəxri Fərmanla təltif olundular. Şagirdlərimizi ürəkdən təbrik edir, onlara daha böyük uğurlar qazanmağı arzulayırıq.
