Şagirdlər Milli Xalça Festivalında
4-5 may 2024-cü il tarixlərində İçərişəhərdə Azərbaycanın ilk Milli Xalça Festivalı keçirildi. UNESCO-nun Ümumdünya İrs Siyahısına daxil olan İçərişəhərin ev sahibliyi etdiyi Milli Xalça Festivalı Azərbaycan Respublikasının Prezidenti İlham Əliyevin 25 noyabr 2016-cı il tarixli Sərəncamı ilə təsis edilmiş “Xalçaçı günü” peşə bayramına həsr edilmişdir və UNESCO-nun Qeyri-maddi mədəni irs nümunələri siyahısına daxil edilmiş Azərbaycan xalçaçılıq sənətinin təşviqi və yaşadılması missiyasını daşıyır.
Məktəbimizin biologiya müəllimi Z.Mehriban rəhbərlik etdiyi 6C sinfi ilə birlikdə festivalda iştirak etmişdir. Festivalda qədim, müasir, eləcədə müəllif xalçalarından ibarət eksklüziv sərgilərin nümayişi, xalçatoxuma sənəti ilə bağlı böyüklər və uşaqlar üçün ustad dərsləri, maarifləndirici seminarlar, interaktiv teatr tamaşası, yarmarka, muğam axşamı və konsert proqramı keçirildi. Milli Xalça Festivalı günlərində İçərişəhərin küçələri xalçalar və xalça ornamentli xüsusi dekorasiyalar ilə bəzədilərək xalçaların rəngarəng və sehirli gözəlliyinə bürünmüşdü.
Xalçatoxuma sənəti ilə maraqlanan şagirdlər xalçanın ərsəyə gəlməsinin bütün mərhələləri, xüsusən, ipliklərin boyanması, çeşnilərin və naxışların vurulması, xalçanın toxunması, emalı, yandırılması, yuyulması prosesi ilə yaxından tanış oldular. Ustad dərsləri zamanı “Azərxalça” ASC-nin Azərbaycanın 14 regionundan gəlmiş toxucu və emal komandası qonaqlara xalça dəzgahı üzərində dərslər nümayiş etdirdi. Həmçinin, Azərbaycan Respublikasının Elm və Təhsil, Mədəniyyət Nazirlikləri Milli Xalça Festivalında öz stendləri ilə təmsil olunurdu.
