20 Yanvar
Xalqımızın qanı bahasına əldə etdiyi azadlığı uğrunda həlak olan şəhidlərimizin bu faciəvi günündən düz iyirmi səkkiz il ötür. 20 Yanvar faciəsi xalqımızın qan yaddaşına yazılmaqla bərabər, “Şanlı gün” kimi də tarixdə qaldı. Bununla bağlı məktəbimizdə mühüm silsilə tədbirlər təşkil edildi.
8-10 Yanvar tarixlərində məktəbimizdə ədəbiyyat və tarix müəllimləri tərəfindən toplantı, mühazirələr təşkil olundu. 20 Yanvar-Ümumxalq hüzn gününə həsr olunmuş “Vətən şəhidləri ilə ucalır” mövzusunda keçirilən inşa müsabiqəsində şagirdlərimiz bu tarixi günlə əlaqədar hiss və düşüncələrini əks etdirdilər.
Şəhidlərimizin əziz ruhuna həsr olunmuş “Şəhidlər ölmür” adlı bədii-qiraət müsabiqəsi keçirildi. Siniflərdə 1990-cu il 20 Yanvar faciəsini əks etdirən fotostendlər, divar qəzetləri və guşələr hazırlandı.
19 Yanvar 2018- ci il tarixdə məktəbimizdə “Qanlı gün-şanlı tarix” adlı tədbir keçirildi. Faciədə həlak olmuş şəhidlərimizin ruhu bir dəqiqəlik sükutla yad edildi. Məktəbin tədris işləri üzrə direktor müavini Mahnur Cəfərova və tərbiyə işləri üzrə direktor müavini Sabir Şahhüseynovun təşəbbüsü və rəhbərliyi altında məktəbin müəllim və şagird kollektivinin müqəddəs yerimiz olan “Şəhidlər xiyabanı”- na ziyarəti təşkil olundu. Şagirdlərimiz şəhidlərimizin məzarı önünə çiçək dəstələri qoyaraq onların ruhunu yad etdilər.
