Şəhidlər qeyrət tacı, ucalıq zirvəsidir,
Şəhidlər haqqın səsi, azadlıq nəğməsidir...
(Əziz Musa)
Muradov İlqar Arif oğlu 14 yanvar 1966-cı ildə Xəzər rayonu Şüvəlan qəsəbəsində anadan olub. O, ailənin üçüncü övladı idi. 1982-ci ildə 237 saylı orta məktəbin VIII sinfini bitirərək Binə qəsəbəsində yerləşən 101 saylı Texniki-Peşə Məktəbinə daxil olub çilingər peşəsinə yiyələnir. İlqarın 13 yaşı olanda atası vəfat edir. 1985-ci ildə İlqar hərbi xidmətə çağırılır. O, 1987-ci ildə Amur vilayətindəki “N” hərbi desant hissəsində hərbi xidmətini başa vuraraq Vətənə dönür.
1990-cı il Bakıdakı “Qanlı Yanvar” hadisələrindən sonra İlqar ərizə verib könüllü olaraq 1993-cü il yanvar ayında cəbhəyə yollanır. Ağdam rayonunun ərazisi uğrunda gedən qanlı döyüşlərdə iştirak edir. O, öz şücaəti ilə tezliklə tərkibində vuruşduğu dəstənin rəğbətini qazanır. 1994-cü il fevralın 27-də Ağdam rayonunun Baş Qərvənd kəndi uğrunda gedən amansız döyüşlərin birində düşmən snayperinə tuş gələrək şəhid olur. “N” hərbi hissəsinin komandiri 24.05.1994- cü il tarixli 7644k nömrəli vəsatət məktubunda bildirir: “Muradov İlqar Arif oğlu son damla qanına qədər qeyrətlə vuruşdu”.
İlqar Muradovun nəşi ailəsinə təhvil verilərək Qala kənd qəbiristanlığında dəfn olunub.
Şəhidin adını əbədiləşdirmək üçün Xəzər Rayon İcra Hakimiyyəti başçısının 2 iyul 1996-ci il tarixli Sərancamına əsasən oxuduğu məktəbə və onun yaşadığı küçəyə adı verilib. 1997-ci il sentyabr ayında İlqar Muradovun məktəb ərazisində büstü qoyulub.
Bir çox mətbuat orqanlarında İlqarın qısa, lakin mənalı həyat və döyüş yoluna həsr olunmuş məqalələr dərc olunub.