Mütəfəkkir şair İmadəddin Nəsimi
Prezident İlham Əliyevin Sərəncamı ilə 2019-cu ilin görkəmli Azərbaycan şairi və mütəfəkkiri, Azərbaycan dilini ədəbi-bədii dil səviyyəsinə yüksəldən böyük ustad İmadəddin Nəsiminin 650 illik yubileyi ilə əlaqədar “Nəsimi ili” elan edilməsi şairə verilən dəyərin, hörmət və ehtiramın ən yüksək göstəricisidir. Eyni zamanda, bu Sərəncam Azərbaycan mədəniyyətinin, zəngin tarixi-mədəni irsinin təbliğinə çox böyük töhfədir. Azərbaycan xalqının çoxəsrlik ənənələrə malik bədii və fəlsəfi fikrində dərin iz qoymuş mütəfəkkir şair İmadəddin Nəsiminin zəngin irsi bu gün də insanların mənəvi-əxlaqi kamilləşməsində mühüm əhəmiyyətə malikdir.
Şərq xalqlarının mədəni sərvətlər xəzinəsində özünəməxsus layiqli yer tutan Nəsimi yaradıcılığı uzun illərdən bəri elmi-ədəbi fikrin diqqət mərkəzindədir. Qüdrətli şairin yaradıcılığının üzə çıxarılan əlyazma nüsxələri əsasında öyrənilməsi Azərbaycan dili və ədəbiyyatı tarixinin tədqiqində yeni mərhələ açmışdır. Nəsiminin əsərləri ölkəmizdə dəfələrlə işıq üzü görmüşdür.
210 №-li tam orta məktəbdə görkəmli Azərbaycan şairinə həsr olunmuş silsilə tədbirlərdən biri də aprelin 8-ində təşkil olundu. Məktəbin Azərbaycan dili və ədəbiyyat müəllimi Sevil Nəzərəliyeva və 8 "A" sinif şagirdləri mütəfəkkir şair İmadəddin Nəsimi ilə bağlı "dəyirmi masa" keçirdi. Şagirdlər şairin həyat və yaradıcılığı, şeirlərinin tədqiqatı haqqında topladıqları geniş məlumatları müzakirə obyektinə çevirərək maraqlı məlumat mübadiləsi həyata keçirdilər.
