156 №-li tam orta məktəb

Məktəbin X A sinif şagirdləri Mirzəzadə Fərid və Əliyev Fateh Polşalı alim Nikola Kopernikin adını daşıyan təhsil yarışması olan "Beynəlxalq Kopernik Olimpiadası"nda Bürünc medal və sertifikata layiq görülüb.

Bu münasibətlə şagirdlərimizi təbrik edir, gələcək olimpiadalarda uğurlar arzulayırıq.

2 aprel tarixində məktəbin akt zalında "Yaşıl dünya naminə həmrəylik ili" nə həsr olunmuş şagirdlərin dünyagörüşünü, ətraf mühitin qorunması ilə bağlı fikirlərini və fənlər üzrə biliklərini yoxlamaq məqsədilə ingilis dili müəllimi Əlizadə Ləmanın təşkilatçılığı ilə VII siniflər arasında Jeopardy proqramı vasitəsilə bilik yarışı keçirilib. Yarış Dövlət Himninin səsləndirilməsilə başlayıb. Daha sonra yarışa start verilib. Yarışda 7 komanda iştirak edib. Cavablar münsiflər heyəti tərəfindən dəyərləndirilib və uyğun şəkildə ballarla qiymətləndirilib. Yarışın nəticələrinə görə VII A sinfinin "Plan B" komandası I yer, VII B sinfinin "Gümüşçülər" komandası II yer, VII F sinfinin "Balaca Eynşteynlər" və VII D sinfinin "Turan" komandası III yerə layiq görülüb. Qalib olan şagirdlər məktəb rəhbərliyi tərəfindən diplom və medalla mükafatlandırılıb.

Şagirdləri təbrik edir, gələcək yarışlarda uğurlar arzu edirik.

“Heydər Əliyev və Azərbaycan tarixi” mövzusunda elmi-praktik konfrans keçirilib

01.04.2024-cü il tarixdə Bakı Şəhər İcra Hakimiyyətinin təşəbbüsü və Xəzər Rayon İcra Hakimiyyətinin təşkilatçılığı ilə Mərdəkan qəsəbəsində yerləşən S.Rüstəm adına Xarici Dillər Təmayüllü gimnaziyada “Heydər Əliyev və Azərbaycan tarixi” mövzusunda elmi-praktik konfrans keçirilib.

Konfransda məktəbimizin IX Ç sinif şagirdi Quluzadə Fatimə və məktəbin tarix müəllimi, elmi rəhbər Ağabəyova Mənzər təmsil edirdi. Onun “Azərbaycan Səlcuqlu imperiyasi tərkibində” mövzusunda hazırladığı referat rayon mərhələsinin qalibi olub. Şagirdimiz Xəzər rayon İcra Hakimiyyəti tərəfindən təşəkkürnamə ilə təltif olunub.

Bu münasibətlə şagirdimizi və Mənzər müəllimi təbrik edir, uğurlar arzulayırıq.

“BAHARIN RƏNGLƏRİ“ Respublika Uşaq Rəsm Yaradıcılıq Turnirinə şagirdimizin rəsm əsəri də seçilib

Azərbaycan Respublikası Mədəniyyət Nazirliyi, Azərbaycan Respublikası Elm və Təhsil Nazirliyi , Azərbaycan Televiziya və Radio Verilişləri Qapalı Səhmdar Cəmiyyəti, Bakı Şəhəri Xətai Rayon İcra Hakimiyyəti, Azərbaycan Rəssamlar İttifaqı / Union of Azerbaijan Artistsın dəstəyi , Azərbaycan Dövlət Rəsm Qalereyası, Xətai Akvarel Qalereyası və Xətai Sənət Bakı Xətai Sənət Mərkəzi Bakı Xətai Sənət Mərkəzi təşkilatçılığı ilə “Yaşıl dünya naminə həmrəylik ili” çərçivəsində uşaq, yeniyetmə və gənclərin yaradıcılığını stimullaşdırmaq həmçinin bədii zövqün inkişafına xidmət məqsədi ilə elan olunmuş "BAHARIN RƏNGLƏRİ" Respublika Uşaq Rəsm Yaradıcılıq Turnirində məktəbin VII F sinif şagirdi Kolosova Alisanın da rəsm əsəri seçilib.

Sərgilənəcək əsərlər Xətai Sənət Mərkəzinin kolleksiyasında saxlanılacaq. Əsəri sərgidə nümayiş olunan müəlliflərə sertifikat və Hollandiyanın boyam markası Artcreation brendindən hədiyyə təqdim olunacaq.

29-31 martda Azərbaycan Cüdo Federasiyası (ACF) və Bakı Şəhər Gənclər və İdman İdarəsinin birgə təşkilatçılığı ilə 15 yaşa qədər kiçik yaşlı yeniyetmələr arasında cüdo üzrə Bakı şəhər birinciliyi keçirilib.

Hövsan qəsəbəsində yerləşən Fövqəladə Hallar Nazirliyinin (FHN) İdman Sağlamlıq Mərkəzində baş tutan yarışda 20kq çəki dərəcəsində qaliblər bəlli olub. Üç gün davam edən yarışda Bakının 70 müxtəlif klub, cəmiyyət və idman təşkilatından 841 cüdoçu arasında medalçılar müəyyənləşib.

Yarışın sonuncu günündə qızlar -36 kq., -48 kq., -63 kq. və +63 kq. çəki dərəcələrində, oğlanlar isə -42 kq., -55 kq., -73 kq. və +73 kq. çəki dərəcələrində medallar uğrunda mübarizə aparılıb.

Məktəbin VIII B sinif şagirdi Əlizadə Nəimə Əzizbala qızı yekun nəticəyə görə II yerə layiq görülüb, diplom və medalla təltif olunub. Şagirdimizi təbrik edir, gələcək yarışlarda uğurlar arzu edirik.