Şəhidlərə həsr olunan onlayn tədbir
26 dekabr tarixində Hazar İlçə Mərkəzləşdirilmiş Kütüphanə Sisteminin Mərkəzi Kütüphanəsi və Antaliya Azərbaycan Kültür və Dayanışma Dərnəyi tərəfindən
"Şehidler Ölməz, Vatan Bölünməz " layihəsi üzrə " Şəhidlik Uca Zirvədir ! " adlı onlayn tədbir keçirildi. Bu möhtəşəm vətən sevgisi ilə şəhidlərimizə minnətdarlıqla köklənmiş tədbirə II Qarabağ müharibəsində şəhid olmuş övladlarımızın
valideynləri, yaxınları toplaşmışdı. Vətənpərvərlik ruhunda keçirilən tədbirdə qardaş Türkiyə ilə Xəzər rayonu mədəniyyət işçilərinin birgə fəaliyyəti nəticəsində Azərbaycanı doğma torpaqlarına qovuşduran dağ vüqarlı igidlərimizin əziz, müqəddəs xatirəsi yad edildi. Ə.Əliyev adına 125 N li tam orta məktəbin şəhidlik zirvəsinə ucalan məzunları da : Heybətov Ağa Əmi , Salamov Vüsal , Əliyev İbrahim digər Xəzər rayon məktəblərinin şəhid məzunları ilə , qəhrəman oğulları ilə bir arada xatırlandı. Hər çıxışda kədərdən qürura yüksələn səmimi ürək sözləri, Vətənə, şəhidlərə sonsuz ehtiram, fəxarət hissi yaddaşlarda silinməz izlər, təəssüratlar yaratdı. Məktəbin direktoru Zeynəb Əliyeva öz məzmunlu və maraqlı çıxışında şəhidlərə dərin minnətdarlıq hissi ilə yanaşaraq ən səmimi duyğularla onları anaraq Vətənin qeyrəti, qüruru, mənliyi rəmzinə çevrilən qəhrəmanlarımızı hər fəaliyyətimizdə yaşadacağımızı vurğuladı. Azərbaycan Şəhidləri! Şəhidlər ölməz, Vətən bölünməz!