Texniki-Humanitar Lisey

Bakı Şəhəri üzrə Təhsil İdarəsinin tabeliyindəki ümumi təhsil müəssisələrinin şagirdləri arasında təşkil olunan III Bakı Elm Olimpiadasının final mərhələsinin təcrübə hissəsi keçirilib.   

Bakı Şəhəri üzrə Təhsil İdarəsi (BŞTİ) və Bakı Ali Neft Məktəbinin birgə təşkilatçılığı ilə keçirilən olimpiada ulu öndər Heydər Əliyevin anadan olmasının 101-ci ildönümünə həsr olunub.

Tədbirdə Elm və Təhsil Nazirliyinin Aparat rəhbəri Mətin Kərimli, Bakı Ali Neft Məktəbinin rektoru Elmar Qasımov, Milli Məclisin Təbii ehtiyatlar, energetika və ekologiya komitəsinin sədri, millət vəkili Sadiq Qurbanov, Sumqayıt Dövlət Universitetinin (SDU) rektoru Rüfət Əzizov, elm və təhsil nazirinin müşaviri Rüstəm Ağayev, Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin (MÜTDA) direktor müavini, BŞTİ-nin müdiri vəzifəsini müvəqqəti icra edən Nərminə Hüseynova, Elm və Təhsil Nazirliyinin şöbə müdirləri Kamran İsmayılov və Elnur Əliyev, Təhsil İnstitutunun direktor müavini Fuad Qarayev, MÜTDA-nın direktor müavini Mehriban Vəliyeva, SDU-nun prorektoru Elşad Abdullayev, Azərbaycan Dövlət Pedaqoji Universitetinin prorektoru Könül Pirverdiyeva, BŞTİ-nin müvafiq struktur bölmə rəhbərləri, məktəb direktorları və şagirdlər iştirak ediblər.

Tədbir Dövlət Himninin səsləndirilməsi və Vətən şəhidlərinin xatirəsinin bir dəqiqəlik sükutla yad edilməsi ilə başlayıb.

Elm və Təhsil Nazirliyinin Aparat rəhbəri Mətin Kərimli olimpiada hərəkatına qoşulan bütün şagirdlərə uğurlar arzulayıb. Nazirlik tərəfindən şagirdlərin tətbiqi elmlərə marağını artıran layihələrə xüsüsi dəstək verildiyini söyləyən M.Kərimli ölkəmizin bu baxımdan beynəlxalq arenada da öz sözünü dediyini, parlaq nəticələr əldə etdiyini bildirib. Aparat rəhbəri qeyd edib ki, ötən tədris ilində şagirdlərimiz beynəlxalq olimpiadalarda 4 qızıl, 17 gümüş və 40 bürünc olmaqla,  ümumilikdə 61 medal qazanıblar. Onları elm qəhrəmanları adlandıran M.Kərimli Bakı Elm Olimpiadasının şagirdlərin  bilik və bacarıqlarını artırmaqla bərabər, həm də  onlarda təlim motivasiyasını yüksəldəcəyinə, özünəinam hissinin artırılmasına müsbət təsir göstərəcəyinə əminliyini ifadə edib.

MÜTDA-nın direktor müavini, BŞTİ-nin müdiri vəzifəsini müvəqqəti icra edən Nərminə Hüseynova yaradıcılıq və elmi-tədqiqat işlərinə maraq göstərən, bu sahədə potensial imkanları ilə fərqlənən istedadlı uşaq və gənclərlə aparılan işlər, şagirdlərdə tədqiqatçılıq qabiliyyətinin formalaşdırılması ilə bağlı paytaxt məktəblərində sistemli olaraq həyata keçirilən layihələr barədə məlumat verib. N.Hüseynova şagirdlərin bilik və bacarıqlarının inkişafında, onların təbiət elmlərinə marağının daha da artırılmasında Bakı Elm Olimpiadasının mühüm rolu olduğunu vurğulayıb.

Bakı Ali Neft Məktəbinin rektoru Elmar Qasımov üçüncü dəfədir ki, keçirilən Bakı Elm Olimpiadasının əhəmiyyətindən danışaraq bildirib ki, bu cür layihələr şagirdlərdə biliklərə marağı artırmaq, ayrı-ayrı fənlər üzrə istedadı ilə fərqlənən gəncləri aşkara çıxarmaq, onların potensial imkanlarının inkişafını təmin etmək baxımından olduqca vacibdir. Rektor BANM-nin elmi-tədqiqat laboratoriyalarında nəzəri biliklərini praktik olaraq tətbiq edən bütün finalçılara uğurlar arzulayıb.

Milli Məclisin komitə sədri, millət vəkili Sadiq Qurbanov təhsil sistemində aparılan islahatyönümlü layihələrin istedadlı gənclərin formalaşmasına zəmin yaratdığını söyləyib. S.Qurbanov ölkədə geniş vüsət alan fənn olimpiadalarının, beynəlxalq bilik yarışlarının bu istiqamətdə atılan mühüm addımlardan olduğunu, istedadlı Azərbaycan gənclərinin qlobal iqlim dəyişmələrinin fəsadlarına qarşı mübarizəyə böyük töhfələr verəcəyinə əminliyini ifadə edib.

Olimpiadanın finalçısı, 291 nömrəli Ekologiya liseyinin X sinif şagirdi Kəklik Əsədova olimpiada və bilik yarışlarını onları uğura aparan yol kimi dəyərləndirib və bütün iştirakçı dostlarına müvəffəqiyyətlər arzulayıb. 

Sonra Bakı Elm Olimpiadasına həsr olunan videoçarx nümayiş etdirilib, 3 nömrəli Uşaq-Gənclər İnkişaf Mərkəzinin dərnək üzvlərinin ifasında mahnı və rəqs kompozisiyaları təqdim olunub.

Daha sonra qonaqlar BANM-nin elmi-tədqiqat laboratoriyalarında olimpiadanın final mərhələsinin II - təcrübə hissəsində iştirak edən finalçıların apardıqları təcrübələrlə tanış olublar.

 Qeyd edək ki, məktəblilər 4 saat ərzində hər fənn üzrə (fizika, kimya, biologiya) 1 təcrübə işini (ümumilikdə 3 təcrübə işi) yerinə yetiriblər.

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində tədris və təlim-tərbiyə prosesinin təşkili və idarə olunması ilə bağlı operativ monitorinqlər keçirilir.

Seçmə üsulla müəyyənləşdirilmiş məktəblərdə monitorinqlərin təşkil olunmasının əsas məqsədi tədrisin və kadrlarla işin təşkili vəziyyətinə nəzarətin artırılması, tədris-pedaqoji sənədlərin mövcud təlimata uyğunluğunun yoxlanılması, maddi-texniki baza və infrastrukturdan istifadə, təhlükəsizlik və nizam-intizam qaydalarına əməl olunması, dövlət elektron məlumat sistemlərinin idarəedilməsinin yoxlanılması, səmərəli tədris mühitinin formalaşdırılmasına dəstək verilməsindən ibarətdir.

Monitorinqlər zamanı, həmçinin sənədlərlə işin təşkili, infrastruktur və maddi-texniki təminat, dərs prosesinin düzgün qurulması, dərnək məşğələləri və dərsdənkənar məşğələlərin tədrisi məsələləri ilə bağlı müşahidələr aparılır.

Monitorinqlərin nəzərdə tutulan əhatə dairəsinin təmin olunması üçün Elm və Təhsil Nazirliyinin əmri ilə müvafiq komissiya yaradılıb.

Monitorinqlərin yekununda təhsil müəssisələrinin rəhbərlərinə səmərəli tədris mühitinin təmin olunması üçün müvafiq təklif və tövsiyələr verilir.

Qeyd edək ki, tədris ilinin sonuna qədər davam etməsi nəzərdə tutulan operativ monitorinqlərin nəticələrinə uyğun olaraq nöqsanlar aşkar olunan ümumi təhsil müəssisələrinin rəhbərləri barədə müvafiq intizam tənbeh tədbirləri görülür.

BŞTİ-nin müdir müavini Xəyalə Əhmədzadə paytaxtdakı 198 və 306 nömrəli tam orta məktəblərdə mayın 14-də keçirilmiş monitorinq prosesinin gedişatını izləyib.

Monitorinqlərin məktəbəqədər təhsil müəssisələrini də əhatə etməsi nəzərdə tutulur.

Bakı Şəhəri üzrə Təhsil İdarəsinin (BŞTİ) tabeliyindəki təhsil müəssisələrində ulu öndər Heydər Əliyevin anadan olmasının 101-ci ildönümü ilə əlaqədar tədbirlər təşkil olunub.

Tədbirlərdə ümummilli lider Heydər Əliyevin keçdiyi zəngin həyat yolu, Azərbaycan xalqının tarixindəki misilsiz xidmətləri barədə söhbət açılıb. Bildirilib ki, müasir Azərbaycan dövlətinin memarı və qurucusu, böyük siyasətçi Heydər Əliyevin uğurlu daxili və xarici siyasəti Azərbaycanın qüdrətlənməsinə, xalqın rifahına, tərəqqi və dirçəlişinə yönəlib, dahi lider bütün fəaliyyəti dövründə elmin, təhsilin inkişafına xüsusi diqqət göstərib. 

Ulu öndər Heydər Əliyevin Azərbaycan xalqının tarix boyu yetişdirdiyi nadir və bənzərsiz şəxsiyyət kimi milyonlarla insanın qəlbində əbədi yaşadığı vurğulanıb. Ümummilli Liderin ideyalarının Azərbaycan Prezidenti İlham Əliyev tərəfindən qətiyyətlə həyata keçirildiyi bildirilib. Heydər Əliyevin müəyyənləşdirdiyi siyasi xətti özündən sonra uğurla davam etdirən Prezident, Müzəffər Ali Baş Komandan İlham Əliyevin yürütdüyü uzaqgörən siyasət nəticəsində ərazi bütövlüyümüzün və suverenliyimizin təmin olunduğu şagirdlərin diqqətinə çatdırılıb. 

Tədbirlərdə Ümummilli Liderin həyat və fəaliyyətinin müxtəlif istiqamətlərindən bəhs edən videoçarxlar, filmlər nümayiş olunub. Həmçinin istedadlı uşaqlar rəsmlər, şeirlər, mahnılar və ədəbi-bədii kompozisiyalarla dahi şəxsiyyətə olan ehtiram və məhəbbətlərini ifadə ediblər.

Eləcə də təhsilalanların və təhsilverənlərin Heydər Əliyevin doğum günü ilə bağlı Fəxri xiyabana ziyarətləri də təşkil olunub.

Texniki-Humanitar liseydə "Azərbaycanın COP29-a sədrliyi qlobal şimal və cənub arasında körpüdür" mövzusunda "dəyirmi masa" keçirilmişdir. Mövzu ilə bağlı müəllimlər və şagirdlər çıxış etmiş və fikir mübadiləsi aparmışlar.

"İşğal altında olmuş torpaqlarda törədilən ekoloji terror" mövzusunda  dəyirmi masa keçirilib. Bu mövzu barədə liseyimizin bir sıra müəllimləri şagirdlərə ətraflı məlumatlar vermiş və şagirdlər hazırladıqları təqdimatlarla çıxış etmişdilər.