92 №-li tam orta məktəb

      Məktəbin kitabxanasında 4c sinif şagirdlərinin iştirakı ilə tədbir təşkil edildi.Tədbirdə kitabxana müdiri G.Mirzəyeva, uşaqlarla sinifdənxaric və məktəbdənkənar tərbiyə işləri üzrə təşkilatçı İ.Məlikova və  sinif rəhbəri A.Nəcəfova iştirak edirdilər. Tədbir şagirdlərin asudə vaxtlarının daha səmərəli keçirilməsinə, elm və bədii kitabların daha çox mütaliə edilməsinə həsr olundu. Şagirdlər bir neçə kitabı mütaliə etdiklərini  müzakirə etdilər.

Dahi şair Məhəmməd Füzulinin 530 illik yubileyi ilə əlaqədar olaraq məktəbimizin şagirdləri arasında “Hər sözüm bir pəhləvandır” adlı inşa yazı müsabiqəsi keçirildi. Müsabiqənin məqsədi dərin məna tutumu, bəşəri və humanist ideyaları, işıqlı fikirlərinə görə seçilən əbədi yaşar sənətkarın yaradıcılığına bir daha nəzər salmaq idi. Şagirdlər türk, ərəb və fars dillərində bənzərsiz bədii fəlsəfi əsərlər yaratmış sənətkarın zəngin irsini yazılarında təsvir etdilər. Şairin lirik qəhrəmanlarını səciyyələndirdilər. Müsabiqənin sonunda yazıları ilə fərqlənən şagirdlər müəyyən olundu.

 2024-cü ildə dahi Azərbaycan şairi və mütəfəkkiri Məhəmməd Füzulinin anadan olmasının 530 ili tamam olur.  Bu münasibətlə məktəbimizdə bir sıra tədbirlərdən biri də VII b sinfində təşkil olundu. Fənn müəllimin dahi şairin yubileyinin UNESCO tərəfindən qəbul olunmuş qərarla beynəlxalq səviyyədə layiqli şəkildə qeyd edilməsinin Ümummilli lider H.Əliyevin adı ilə bağlı olduğunu vurğuladı.  Şagirdlər görkəmli şair, anadilli poeziyanın mükəmməl nümunələrini yaradan sənətkar haqqında hazırladıqları məruzələri təqdim etdilər və onun yaradıcılığına istinad edərək şeirlər səsləndirdilər.  Sonra qüdrətli sənətkarın həyatı və fəaliyyətinə həsr olunmuş sənədli filmi izlədilər.

   Azərbaycan Respublikasının Elm və Təhsil Nazirliyinin “səhiyyə sistemi” işçi qrupunun 2024 – cü il üçün Fəaliyyət Planına uyğun olaraq məktəbimizin VII və VIII sinif şagirdləri ilə maarifləndirici görüş keçirildi. Tədbirin məqsədi şagirdlərə sağlam qidalanma və düzgün gigiyena qaydaları haqqında məlumat verməkdən ibarət idi. İştirakçılara ağız boşluğuna düzgün qulluq edilməsi, diş ətinin və dişin mina qatının qorunmasının yolları ilə bağlı tövsiyələr verildi. Şagirdlər mövzu ilə bağlı təqdim oluna video – çarxı maraqla izlədilər.

  3a sinfində məktəbimizin  şəhid məzunu Yaqub Yaqubzadənin doğum gününə həsr olunmuş sinif təşkilat saatı keçirildi. Şəhidin ibtidai sinif müəllimi Natavan  Cəlilova onun həyatı, arzuları haqqında şagirdlərlə söhbət apardı və bildirdi ki, 22 aprel  şəhid Yaqubzadə Yaqubun doğum günüdür. Əslində Yaqubun simasında bütün şəhidlərimiz ölməzdir. Onlar şəhadətə yüksəlməklə yenidən doğulurlar. Şəhadətdə yeni yaşın mübarək Yaqub!     

    Sonda şagirdlər II Qarabağ müharibəsi mövzusunda videoçarxlar izlədilər.