46 №-li tam orta məktəb

 Hacı Zeynalabdin Tağıyev! Dünya onu öz xalqının Böyük oğlu, xeyriyyəçisi kimi tanımaqdadır. Saysız-hesabsız xidmətləri arasında müsəlman şərqində qadınların uğurlu gələcəyinə işıq saçan Bakıdakı ilk qız məktəbi nümunəsi də var. Xalqımızın mədəni inkişafında xüsusi xidmətləri olan Hacı Zeynalabdin Tağıyevin xatirəsi 3 C sinfinin şagirdləri üçün də çox əzizdir Bu məqsədlə də 3 C sinif şagirdləri sinif rəhbərləri Tatyana Mustafayeva ilə birlikdə onun ev muzeyinə ekskursiya təşkil etdilər və xeyli sayda xatirə şəkilləri çəkdirdilər.

 Ümumi təhsil müəssisələrində normal iş ahənginin qurulması və təlim-tərbiyə prosesinin mövcud qanunvericiliyinin tələblərinə uyğun aparılması təhsil müəssisələrində təhlükəsizlik mühitinin yaradılması barədə Azərbaycan Respublikasının Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyindən Bakı Şəhəri üzrə Təhsil İdarəsinə daxil olmuş 06.04.2024-cü il tarixli 69-D-113 nömrəli məktuba əsasən konfrans zalında məktəbin direktoru Sevinc Budaqova, təlim-tərbiyə işləri üzrə direktor müavini Gülnarə İsmayılova, Lalə Ələkbərova, tərbiyə işləri üzrə direktor müavini Aidə Quliyeva tərəfindən məktəbin pedoqoji heyəti üçün maarifləndirmə tədbiri keçirildi.

 Tədbirdə aşağıdakı mövzulara toxunuldu:

- müxtəlif vaxtlarda ayrı-ayrı təhsil müəssisələrində baş vermiş neqativ halların nəzərdən keçirilməsi;

- məktəbdə həftənin bir gününün təhlükəsizlik günü elan edilməsi, həmin gün monitorinqlərin aparılması;

- siniflərdə çantalara baxış keçirilməsi;

- məktəbə giriş və çıxışlara nəzarətin gücləndirilməsi;

- həftə sonunda müsbət və nümunəvi davranışı ilə fərqlənən şagirdlərin rəğbətləndirilməsi;

- risq qrupunda olan şagirdlərlə məktəb psixooqu tərəfindən işlərin aparılması, nəticələrlə sinif rəhbərlərinin məlumatlandırılması;

- şagirdlərin hər gün məktəbə qəbulu və məktəbdən evə yola salınmasının müəllimin müşayəti ilə aparılması.

Bakı Şəhəri üzrə Təhsil İdarəsinin tabeliyindəki ümumi təhsil müəssisələri üzrə I sinfə qəbul prosesində prioritet tətbiq olunacaq məktəblərin siyahısı açıqlanıb.

Belə ki, məktəblərə şagird qəbulu sərbəst formada və prioritetə (üstünlük hüququ) əsasən aparılacaq. Sərbəst formada şagird qəbulu aparılan məktəblərə valideynlər şəxsi kabinet vasitəsilə məktəb və müəllim seçimini birbaşa edəcəklər. Prioritet (valideyn və ya uşağın məktəbin müəyyənləşdirilmiş ərazisinə (dislokasiya) qeydiyyatı olmalı, bacı-qardaşı həmin məktəbdə hazırda təhsil almalı, valideynlərindən biri həmin məktəbdə çalışmalı) üzrə valideynlər isə ilk növbədə müəyyən edilmiş müddətdə (Azərbaycan bölməsi üzrə 3 may-3 iyun 2024-cü il, tədrisi digər dillərdə aparılan bölmələr üzrə isə 12 iyun-12 iyul 2024-cü il tarixlərində) üstünlük hüquqlarından biri əsasında  sorğu yerləşdirə bilərlər. Prioritetlərin tətbiqi yaşayış sıx olan ərazilərdə valideynlərin məktəb seçimini asanlaşdırmaq məqsədlərinə xidmət edir.

Qeyd edək ki, müvafiq müddət başa çatdıqdan sonra üstünlük hüququ tətbiq olunan məktəblərdə boş qalan şagird yerlərinə sərbəst qəbul (tədrisi digər dillərdə olan və müsabiqə yolu ilə qəbul aparılan liseylər istisna olmaqla) aparılacaq.

Məlum olduğu kimi, mayın 1-də 2024-2025-ci tədris ili üzrə ümumi təhsil müəssisələrinin birinci siniflərinə şagird qəbulu üzrə uşaqların qeydiyyatına www.mektebeqebul.edu.az elektron portalı vasitəsilə start veriləcək.

Prioritet tətbiq olunan məktəblərin siyahısı:

Azərbaycan bölməsi üzrə üstünlük hüququ tətbiq olunan məktəblər

Tədrisi digər dillərdə aparılan bölmələr üzrə üstünlük hüququ tətbiq olunan məktəblər

 Məlum olduğu kimi ölkə başçısı İlham Əliyevin müvafiq sərəncamı ilə 2024-cü il ölkəmizdə “Yaşıl dünya naminə həmrəylik ili” elan edilib. Sərəncamda qeyd olunur ki, Azərbaycanın 2030-cu ilə qədər sosial-iqtisadi inkişafa dair beş milli prioritetindən biri “Təmiz ətraf mühit və yaşıl artım ölkəsi” kimi müəyyən edilib. Həmin prioritetə uyğun olaraq, ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində işlər aparılır.

 Elm və təhsil nazirinin 15.03.2024-cü il tarixli, 3-29/3-145F/2024 nömrəli əmri ilə “Yaşıl dünya naminə həmrəylik ili” ilə əlaqədar tədbirlər palnı təsdiq olunmuşdur. Həmin plan əsasında məktəbimizdə silsilə tədbirlər keçirilməyə davam edir.

 Bu gün məktəbin konfrans zalında “2024-Yaşıl dünya naminə həmrəylik ili” adlı sərgi və tədbir keçirildi. Tədbirdə məktəbin rəhbərliyi, pedoqoji kollektivi, şagird heyəti ilə yanaşı, qonaq qismində Nəsimi rayon İcra Hakimiyyəti Başçısının birinci müavini Gülarə Verdiyeva, Bakı Şəhər Təhsil İdarəsinin inkişaf layihələri sektorunun müdiri Günay Qurbanova təşrif buyurmuşdu.

 Tədbiri ilk öncə məktəbin tərbiyə işləri üzrə direktor müavini Aidə Quliyeva açıq elan edərək qonaqları salamladı. Ardınca Azərbaycan Respublikasının Dövlət Himni səsləndirildi və Vətən uğrundə canını fəda etmiş Şəhidlərin əziz xatirəsi bir dəqiqəlik sükutla yad edildi.

 Tədbirdə xüsusi yer “Kiçik Akademiya” üzvlərinin təqdimatlarına verildi. İlk öncə 8 B sinif şagirdi tərəfindən hazırlanmış "Ağıllı şəhər" layihəsi təqdim olundu.

 Ardınca isə Solmaz Ulubəyovanın rəhbəri olduğu və 9 B sinif şagirdlərinin birlikdə hazırladıqları "Yaşıl enerji mənbələri" layihəsi təqdim olundu. Şagirdlərin hər biri layihədə hazırladıqları detallar barədə məlumatlar verməklə yanaşı, hər bir detalı əyani olaraq da göstərdilər.

Tədbirin sərgi hissəsinə keçməmişdən öncə isə 5 C sinif şagirdlərinin "Xarıbülbül" mahnısı sədaları altında rəqsləri nümayiş olundu.

Məktəbin direktoru Sevinc Budaqova daha sonra qonaqları şagirdlərin əl işlərinə baxmağa dəvət etdi. Müxtəlif tullantı məmulatlarından hazırlanan əl işləri rəngarəngliyi ilə seçilirdi. Hər bir uşaq öz əl işini nə ilə və nə məqsdlə hazırladıqları barədə dolğun məlumatlar verirdilər. Sərgidə həmçinin məktəbin istedadlı şagirdləri tərəfindən çəkilmiş rəsm əsərləri də nümayiş olundu.

 Sərgi bitdikdən sonra isə son olaraq 3 Ç sinif şagirdlərinin ifasında "Dostluq himni" mahnısı səsləndirildi.

 Tədbirin sonunda söz qonaqlara verildi. Gülarə xanım Verdiyevə çıxış edərək tədbirə dəvət olunduğu və belə gözəl tədbirdə iştirak etdiyi üçün çox məmnun olduğunu vurğuladı. 2024-cü ilin “Yaşıl dünya naminə həmrəylik ili” elan olunmasının başlıca səbəblərindən, layihənin mahiyyətindən danışaraq şagirdləri məlumatlandırdı. Günay xanım Qurbanova da çıxış edərək hər kəsə təşəkkürünü bildirdi, Gülarə Verdiyevanın sözlərinə qoşulduğunu və ona hədiyyə olunan əl işlərini otağının bir küncünə əlavə edəcəyini bildirdi.

 Son olaraq Sevinc Budaqova tədbirin ərsəyə gəlməsində əməyi olan hər kəsə, dəvətini geri çevirməyərək gələn qonaqlara dərin təşəkkürünü bildirərək, xatirə şəkilləri çəkdirdi və tədbiri sonlandırdı.

 Aprelin 18-i dünyada Beynəlxalq Abidələr və Tarixi Yerlər Günü kimi qeyd olunur. Bu əlamətdar gün Tarixi Yerlər və Abidələrin Mühafizəsi Şurasının (ICOMOS) təklifi ilə UNESCO tərəfindən 1983-cü ildə təsis olunub. Məqsəd insanların diqqətini abidələrin və tarixi yerlərin qorunmasına yönəltməkdir.

 Məktəbimizdə şagirdləri bu barədə məlumatlandırmaq məqsədilə uşaq birliyi rəhbəri Süsən Məmmədova ölkə ərazisində ziyarət olunacaq 29 tarixi və mədəniyyət abidəsi ilə şagirdləri tanış etdi. İlk öncə 7 Ç sinif şagirdləri ilə söhbət aparan uşaq birliyi rəhbəri onlarla getdikləri və ya getmək istədikləri tarixi yerlər haqqında sorğu keçirdi. Şagirdlərin marağına səbəb olan mövzu haqqında ətraflı danışıldı, hətta yalnız Azərbaycan daxilində deyil xaricində də getdikləri və maraqlandıqları yerlər haqqında müzakirələr aparıldı.

 Daha sonra 4 A sinif şagirdləri də öz növbələrində gördükləri, müşahidə etdikləri yerlər haqqında, müəllimləri ilə təşkil olunan ekskursiyalar haqqında, valideynləri ilə etdikləri səyahətlər haqqında danışdılar. Uşaq birliyi rəhbəri tarixi və mədəniyyət abidələri haqqında hazırladığı slaydı uşaqlara nümayiş etdirdi və onlar haqqında qısa məlumatlar verdi. Bunlar- Böyük Mərdəkan Qəsri, Kiçik Mərdəkan Qəsri, Ramana Qəsri, Nüşabə qalası, Möminə Xatın Türbəsi, Qarabağlar Tarixi Mədəniyyət Kompleksi, Uğurlu Xan Karvansarayı, Gəncədə yerləşən Cümə Məscidi, Balakəndə yerləşən Minarəli Məscid, Ordubadda yerləşən Qeysəriyyə məbədi, Gəncədə yerləşən Hamam və digər tarixi yerlər idi.