272 №-li tam orta məktəb

Ulu öndər Heydər Əliyevin 101 illik yubileyi ilə əlaqədar məktəbin 8-ci sinif şagirdləri arasında futbol üzrə Birincilik yarışması keçirilib. Yarışmanın sonunda 8C sinif şagirdləri I, 8A sinif şagirdləri II, 8D sinif şagirdləri isə III yerə layiq görülüblər və diplomla təltif ediliblər.

Azərbaycan Respublikası Dövlət İmtahan Mərkəzi tərəfindən ümumi tam orta təhsil səviyyəsi üzrə 2023/2024-cü tədris ilində keçirilən buraxılış imtahanında  məktəbin 153 şagirdi iştirak edib. 47 şagird 200-dən yuxarı, 69 şagird 100-dən artıq bal toplayıb, 18 şagird qırmızı attestata namizəddir.

Məktəbin akt zalında sosioloq Həcər Həsənovanın təşkilatçılığı ilə “Ailə və uşaq munasibətləri” adli tədbir keçirilib. Tədbirdə məktəbin direktoru Səfurə Rəhimova, müəllimlər və şagirdlər iştirak ediblər.

Həcər xanım mövzuya dair təqdimatla çıxış edərək ailə, eyni zamanda milli-mənəvi dəyərlərin qorunaraq gənc nəslə ötürülməsinin önəmindən, ailədaxili münasibətlərin, yaşlı və gənc nəsil arasında dialoqun düzgün formalaşmasının vacibliyindən bəhs edib.

Sonra şagirdlərin hazırladıqları rəqs nömrələri və səhnəciklər nümayiş etdirilib.

Məktəbin bir qrup müəllimi Azərbaycan Təhsil İşçiləri Azad Həmkarlar İttifaqı Nizami rayon komitəsinin sədri Sübut Əsədov tərəfindən təşkil olunan Azərbaycan Dövlət Gənc Tamaşaçılar Teatrında “Mən gəldim, qızlar” (“Müharibə”) adlı tamaşanı izləyiblər.

İsveç dramaturqu Lars Norenin “Müharibə” pyesi əsasında hazırlanmış tamaşanın quruluşçu rejissoru teatrın baş rejissoru, əməkdar incəsənət xadimi Bəhram Osmanovdur. Səhnə əsəri milli, irqi, dini mənsubiyyətindən, sosial mənşəyindən asılı olmayaraq, hər bir millətin və hər kəsin başına gələ biləcək hadisələri özündə əks etdirir. Əsərdə müharibədən gözləri kor olmuş, ancaq ümidini itirmədən səbirlə, ən çətin anlarında belə ailəsini, qızlarını düşünən atanın 2 ildən sonra gəlib evinə çıxmasını qəhrəmanın mənəvi qələbəsi saymaq olar. Səhnə əsərində atanın, eləcə də ana və qızlarının həyatına nəzər saldıqda müharibənin bütün ağrı və acılarını, mənəvi sarsıntılarını, daxili əzablarını görmək o qədər də çətin deyil.

Tamaşanı maraqla izləyən müəllimlər çox gözəl təsuratlarla teatrdan ayrılıblar.

Məktəbinin direktor müavini Sevil Rəfiyevanın rəhbərliyi və ibtidai sinif müəllimlərinin iştirakı  ilə Azərbaycan Respublikasının Təhsil İnstitutu 2024-cü ilin may ayında keçiriləcək IV sinifdə təhsil alan şagirdlərin tədris dili və riyaziyyat fənləri üzrə səriştə əsaslı monitorinqinin çərçivə sənədinin müzakirəsi keçirilib.

Şagird nailiyyətlərinin yaxşılaşdırılması, IV sinfin sonunda şagirdlərdə müvafiq standartlar üzrə bilik və bacarıqların hansı səviyyədə formalaşdığının müəyyən edilməsi və ibtidai təhsil səviyyəsində keyfiyyətin artırılması istiqamətində tədbirlərin görülməsi monitorinqin əsas məqsədlərindəndir.

Monitorinqdə şagirdlərə təqdim olunacaq tapşırıqlar tədris dili fənnindən oxu və dil qaydaları məzmun xətlərini, riyaziyyat fənnindən isə ədədlər və əməllər, cəbr və funksiyalar, həndəsə, ölçmə, statistika və ehtimal məzmun xətlərini əhatə edəcək.