195 №-li tam orta məktəb

    17 aprel 2024-cü il tarixində məktəbin psixoloqu  Ramiyə Məmmədlinin  təşkilatçılığı ilə  VIII siniflərdə ''Erkən nikaha yox deyək'' mövzusunda psixoprofilaktik söhbət aparıldı. Söhbət zamanı erkən nikahın fəsadlarından danışaraq, qeyd etdi ki, erkən nikah-nikah yaşına çatmamış şəxslərin ailə qurması, bu nikahın heç bir hüquqi qüvvəyə malik olmaması, qanunsuz hesab edilməsidir.  Erkən nikah  həm də təhsilin  effektiv  şəkildə başa çatdırılmasına mane olur. Məktəb yaşlı bir uşaq ailə qurarkən  məktəbdə həmyaşıdlarından, öz uşaq həyatından  məcburi ayrılaraq ailə həyatına atılır və yeni vəziyyətə adaptasiya olunması çətin olur.  Həmçinin qeyd olundu ki, erkən nikahın mənfi cəhətləri olduqca çoxdur. İlk öncə erkən nikahın qeyri-qanuni olması, üstəlik çoxsaylı, psixoloji, tibbi, iqtisadi fəsadlar bu tip nikahın əleyhinə işləyir. Uşaqlıq insan həyatının ən gözəl, ən əhəmiyyətli illəridir. Xoşbəxt, sağlam böyümüş  uşaq sağlam gələcək  deməkdir. Bu məqsədlə ''Erkən nikaha yox deyək'' mövzusunda psixoprofilaktik söhbət aparılmasınn məqsədi erkən nikahın psixoloji, tibbi, iqtisadi fəsadlarını şagirdlərə çatdırmaqdır. Şagirdlərə mövzu ilə əlaqədar videoçarx nümayiş etdirildi. Sonda şagirdlər dinlənildi və onları maraqlandıran suallar cavablandırıldı.

    16 aprel 2024-cü il tarixində məktəbin VIIa sinif şagirdləri  musiqi müəllimi İnci Əsgərovanın təşkilatçılığı ilə ''Qaraca qız'' filminin bir hisəsi canlandırıldı. Əvvəlcə şagirdlərə ''Qaraca qız'' baleti barəsində qısa məlumat verildi. Qeyd olundu ki ''Qaraca qız'' baleti uşaqlar üçün yazılmış ilk irihəcimli musiqi əsəridir. Həmçinin qeyd olundu ki, bəstəkar Əşrəf Abbasov ''Qaraca qız'' baletini Süleyman Sani Axundovun ''Qorxulu nağıllar'' silsiləsindən olan eyniadlı hekayə əsasında yazmışdır. Tədbirdə iştirak edən məktəb psixoloqu tədbirin keçirilməsinin məqsədindən danışdı və qeyd etdi ki, əsər bədii-estetik təsiri ilə yanaşı məktəb yaşlı uşaqların psixoloji tərbiyəsində mühüm əhəmiyyət kəsb edir. Tədbirin keçirilməsində məqsəd Azərbaycan uşaq ədəbiyyatının nadir incilərindən olan Qaraca qız obrazını şagirdlərə yaxından tanış etmək idi.

    15 aprel 2024-cü il tarixində III-IV siniflər arasında monitorinq imtahanı keçirildi. Monitorinqdə şagirdlərə Azərbaycan dili fənnindən 15 sual, Riyaziyyat fənnindən 15 sual təqdim olundu. Şagirdlərə sualların cavablandırılması üçün 90 dəqiqə vaxt verildi. Monitorinqin təşkilinin məqsədi fənnlər üzrə şagirdlərin təlim nəticələrinin təhlili əsasında mövcud vəziyyətin təhlili, şagird nailiyyətinin yüksəldilməsi üçün düzgün planlaşdırma aparmaq, fənn standartlarının hansı səviyyədə reallaşmasını aşkar etməkdir. Şagirdlərin nəticələri ən qısa zamanda elan olunacaq.

    09 aprel 2024-cü il tarixində Ramazan bayramı ilə əlaqədar məktəbin psixoloqu Ramiyə Məmmədli, biologiya müəllimi Aynur Abzərova, Azərbaycan dili və ədəbiyyat müəllimi Gözəl Həsənova və kitabxanaçıların təşkilatçılığı  ilə Və, VIIb, VIIc və IXe sinif şagirdləri və onların valideynləri tərəfindən Vətən müharibəsi qəhrəmanıları Ələddin Xəlilovun və Pünhan Abbassovun ev muzeyləri ziyarət edildi. Şəhid valideynləri şagirdləri hörmətlə qarşıladı, onlara öz övladlarının vətənpərvərliyi, qəhrəmanlığı, döyüşlərdə göstərdiyi şücaət barədə məlumat verdilər. Həmçinin şagirdlər şəhidin ev muzeyi ilə, şəhidin şəxsi əşyaları ilə tanış oldular. Şagirdlər vətənpərvərliyə, qəhrəmanlığa və şəhidlərə həsr olunmuş şeirlər söylədilər. Ziyarətin əsas məqsədi şagirdlərdə vətənpərvərlik hisslərini gücləndirmək, onları şəhidlərimizin qəhrəmanlıqları ilə tanış etmək idi.

08 aprel 2024–cü il tarixində məktəbin akt zalında “Bilgənin macəraları” kitab seriyasından “ Həkim Bilgə” və “ Səyyah Bilgə” kitablarının təqdimatı və müəllif, eyni zamanda məktəbin ibtidai sinif müəllimi Aynur Cavidlə görüş keçirildi. Məktəb kitabxanasının müdiri Səkinə Əfəndiyeva  və kitabxanaçısı Yaqut Eyvazovanın təşkilatçılığı ilə hazırlanan tədbirdə kitablar haqqında videoçarx və şəkillər nümayiş olundu, kitab klubunun şagirdləri kitab haqqında fikirlərini səsləndirdilər. Bilgənin başına gələn  macəraları  əks  etdirən səhnəciklər göstərildi. Tədbirdə qonaq qismində iştirak edən Qobustan qəsəbə ziyalılarından şair Qorxmaz Kadusi, ədəbiyyat bilicisi Zahir Zülfiqarlı kitab və mütaliənin vacibliyi haqqında danışaraq, öz xatirələrini bölüşdülər.Son olaraq  məktəbin təlim-tərbiyə işləri üzrə direktor müavini Vəfa Hüseynova, ibtidai sinif müəllimi Xatirə Qasımova kitabın uşaq ədəbiyyatındakı rolu haqqında çıxış edərək, müəllifə uğurlar dilədilər.  Görüşü keçirməkdə məqsəd mütaliə bacarıqlarının gücləndirilməsi, yeni kitabların və müəlliflərin tanıdılmasından ibarət idi.