18 №-Lİ TAM ORTA MƏKTƏB

Müasir dövrün vacib məsələlərindən biri də asudə vaxtın təşkili məsələsidir.  Çünki sağlam əqidənin formalaşması, güclü iradənin inkişafı, müsbət əxlaqi keyfiyyətlərə yiyələnmə və ümumiyyətlə, sağlam gəncliyin təməli düzgün təşkil olunmuş asudə vaxtdan da asılıdır. Şagirdlərin məktəb mühitində əldə etdikləri bilik, bacarıq və vərdişlər qədər dərsdənkənar fəaliyyətləri də onların hərtərəfli şəxsiyyət kimi formalaşmasının bir parçasıdır. Məktəblilərin asudə vaxtının düzgün və səmərəli təşkilində idman da mühüm rol oynayır. Boş vaxtlarında idmanla məşğul olan şagirdlər daha sağlam, başqa insanlarla münasibətdə daha anlayışlı, təvazökar, mehriban, dostcanlı və s. qabiliyyətlərə malik olurlar. Bir sözlə, onlarda aktiv həyat tərzi formalaşır. Uşaqlarda güclü tərəflərin – yəni maraq dairəsində olan məsələlərin aşkarlanması onların asudə vaxtının səmərəli keçirilməsi üçün açar rolunu oynayır.

Məktəbimiz ilə Türkiyənin İzmir Çiyli Yıldız Tınas İzmiroğlu Anadolu Liseyi arasında “Qardaş məktəblərin əməkdaşlığı müqaviləsi” imzalanıb.

Türkiyənin təhsil işçilərindən ibarət nümayəndə heyətini qonaq edən məktəbimizin akt zalında təşkil olunan konsert tədbiri  Azərbaycan və Türkiyə Respublikalarının Dövlət Himnlərinin səslənməsi ilə açıq elan edildi. "Qardaşlıq körpüsü" adlanan bu möhtəşəm konsertdə qonaqlar Azərbaycanın böyük sənət əsərlərini, tamaşalaşdırılmış konsert proqramını gözəl istedadlı, dünya müsabiqələrinin qalibləri Milana Nəbiyeva, Davud Nəsirli, Nərmin Nərimanlı, Solmaz İsmayılzadə, Əhməd Məmmədov, Xədicə Rəşid, Nihad Yusifzadə, Dəniz, Raul, İbrahim, İsmayıl, İlkin, İnci, Hüseyn, İsa, Həsən, Elnarə, Denis  Daniel və digərlərinin  ifasında dinlədilər. Konsertin aparıcısı Nübar Əbili idi. Konsertdə qonaq qismində sənətkarlarımız da iştirak etdilər: Böyük rəqqasə, "Xalq Artisti" Cəmilə Bayramovanın "Dəcəl qızlar" rəqs qrupu, Azərbaycanın gözəl avazlı, rəngli səs  ifaçısı, "Xalq artisti" Gülyaz xanım Məmmədova və səsinin rəngi ilə sayılıb-seçilən gözəl ifaçı, "Xalq ulduzu" yarışmasının qaliblərindən Nicat Mənsimov gecəni daha da möhtəşəm etdilər.

Sonda məktəbin direktoru çıxış edərək bildirdi ki, Azərbaycan və Türkiyə daim bir-birini ən yüksək səviyyədə dəstəkləyir, milli maraqlarının qorunmasında qətiyyətli mövqe nümayiş etdirirlər. Türkiyə və Azərbaycan nəinki regionda, eləcə də beynəlxalq miqyasda bir-birini ən sıx və yaxından dəstəkləyən ölkələr kimi çıxış edirlər. Konsert xatirə şəklinin çəkilməsi ilə başa çatdı.

P.S. Onu da qeyd edək ki, möhtəşəm konsertin təşkilatçısı türk dünyasının sevimli səsi "Əməkdar artist" Aybəniz xanım Haşımova idi.

Türkiyənin təhsil işçilərindən ibarət nümayəndə heyəti Azərbaycanda səfərdədir.

Bakı şəhəri 18 nömrəli tam orta məktəb ilə Türkiyənin İzmir Çiyli Yıldız Tınas İzmiroğlu Anadolu Liseyi arasında “Qardaş məktəblərin əməkdaşlığı müqaviləsi” imzalanıb. 

Ev sahibi qismində iştirak edən məktəbimiz qardaş ölkədən gələn qonaqları şəhərimizin müxtəlif parkları, xiyabanları (Fəxri Xiyaban, Şəhidlər Xiyabanı) və muzeyləri ilə tanış etdi, xatirə şəkilləri çəkildi.

  Məktəbimizin 9-cu sinif şagirdi Nəsrullayev Nəcəf Əşrəf oğlu 31 mart - 1 aprel 2024-cü il tarixlərdə keçirilən U-18 Yeniyetmə oğlanlar arasında ACF kubokunda cüdo idman növü üzrə 3-cü (50 kg) yerə layiq görülmüşdür. Eyni zamanda bu turnirdə nəticə verdiyinə görə, 2-5 may 2024-cü ildə keçiriləcək "Goygol European Cup"-na lisenziya qazanmışdır. Şagirdimizi təbrik edir, uğurlar arzulayırıq.

Türkiyənin İzmir şəhərində yerləşən Yıldız Tınas İzmiroğlu Anadolu Lisesi ilə məktəbimiz arasında “Kardeş Okul İş Birliği Sözleşmesi” imzalanmışdır. Müqaviləyə əsasən, məktəbimizin qonağı olan liseyin 6 müəllim və 11 şagirddən ibarət heyətinin iştirakı ilə bu gün məktəbimizdə “Azərbaycan-Türkiyə qardaşlığının dünəni, bu günü, sabahı!” adlı tədbir keçirildi. Tədbir Azərbaycan Respublikasının Dövlət Himni və Türkiyə Cümhuriyyətinin Dövlət Himni-İstiqlal Marşı ilə başlandı. Məktəbin direktoru Leyla Fətiyeva qonaqları salamlayaraq Azərbaycan-Türkiyə münasibətlərindən danışdı. Sonra məktəbin psixoloqu Arzu Məmmədovanın “Azərbaycan-Türkiyə qardaşlığının dünəni, bu günü, sabahı!” mövzusunda təqdimatı tədbir iştirakçılarına təqdim olundu. Azərbaycan-Türkiyə qardaşlığının tarixi xronoloji ardıcıllıqla nəzərdən keçirildi. Məktəbin şagirdlərinin iştirakı ilə Azərbaycan-Türkiyə münasibətlərini özündə əks etdirən şeirlərin təqdim olunmasından sonra qonaqlar da mövzu ilə bağlı fikir mübadiləsinə qoşularaq təəssüratlarını bölüşdülər.