164 №-li tam orta məktəb

     “Məhəmməd Füzulinin 530 illiyi" ilə əlaqədar olaraq məktəbin Azərbaycan dili və ədəbiyyatı müəllimi Sevinc Beybudova 10 "a" sinfində şagirdlərlə M.Füzulinin"Leyli və Məcnun"əsərinin təhlilinə həsr olunmuş tədbir keçirib.Tədbirdə M.Füzulinin yaradıcılığının zirvəsi olan "Leyli və Məcnun" poemasının Azərbaycanda deyil, eyni zamanda Şərq və dünya poemasının nadir incilərindən olması barədə şagirdlərin fikirləri dinlənilib, poemadan şeir parçaları səsləndirilib.

      Daha sonra şagirdlər dahi bəstəkar Üzeyir Hacıbəylinin "Leyli və Məcnun" operasından parçalar səsləndirərək poemanın müəyyən hissələrini səhnələşdiriblər.

    Tədbirdə məktəbin təlim -tərbiyə işləri üzrə direktor müavini Nazimə Zeynalova və məktəbin təşkilatçısı İradə İsmayılzadə də iştirak ediblər. Sonda N.Zeynalova tədbirlə bağlı şagirdlərə fikirlərini bildirib və dahi şairin əsərlərini daha dərin öyrənməyi məsləhət edib.

Azərbaycan Respublikasının Prezidenti İlham Əliyevin "Məhəmməd Füzulinin 530 illiy"i ilə əlaqədar sərəncamına əsasən məktəbin Azərbaycan dili və ədəbiyyatı müəllimi Əliyeva Bacıxanım 11"A" sinif şagirdləri ilə birlikdə şairin həyat və yaradıcılığına həsr edilən müzakirə keçirib.
Müzakirədə şairin həyatının mühüm məqamları vurğulanıb və yaradıcılığı şaxələndirilib.
M.Füzuli lirikasından müxtəlif janrlarda olan şeirlər səsləndirilib, poema yaradıcılığı, nəsr əsərləri barəsində ətraflı məlumat verilib. Füzuli kantatasına qulaq asan şagirdlər həm qəzəlin, həm də poema yaradıcılığının zirvəsi sayılan "Leyli və Məcnun"poemasını Nizami Gəncəvinin "Leyli və Məcnun" əsəri ilə müqayisəli şəkildə maraqlı təhlil ediblər. "Leyli və Məcnun" operasından fraqmentlər göstərilərək obrazlar səciyyələndirilib. Sonda məktəbin direktoru Kəmalə Qədirova və təlim-tərbiyə işləri üzrə direktor müavini Nazımə Zeynalova tədbir haqqında öz fikirlərini və tövsiyələrini şagirdlərə bildiriblər.

İnsan doğulduğu andan təbiətlə sıx əlaqədə olur. Buna görə də insan, təbiət və cəmiyyət üçlüyünü bir-birindən ayrı təsəvvür etmək mümkün deyil. Məktəbimizin müəllim və şagird kollektivi olaraq biz də insanlığa xidmət edən dövlət tədbirlərindən kənarda qala bilmərik. Bu niyyətlə Azərbaycan təbiətinin gözəlliyi, bu gözəlliyə insanların münasibəti, təbii ehtiyatlara qayğını təbliğ edən müxtəlif fənlərin tədrisini açıq havada-təbiətin qoynunda keçirmək şagirdlər üçün çox maraqlı olur. Məktəbin 7 "B" sinif şagirdləri “Yaşıl dünya naminə həmrəylik ili” çərçivəsində ədəbiyyat dərsini açıq havada- təbiətin qoynunda keçiriblər. Ədəbiyyat müəllimi H.Bəşirova dərslikdəki VI bölməyə - “Təbiətə vurğunluq, təbiətə qayğı” ya uyğun olaraq verilmiş mövzulardan söhbət açıb. M. Müşfiqin “Yağış yağarkən”, B.Həsənovun “İki bala”, Ə.Kürçaylının “Qaranquş”, İ.Əfəndiyevin “Şəhərdən gələn ovçu” əsərləri haqqında danışıb, təbiətdəki hadisələrin gözəlliyini, zəngin təbiətli Azərbaycanın gül-çiçəkli çəmənlərini, başı qarlı dağlarını, yaşıl yamaclarını insanların bu hadisələrə münasibətini şərh edib. Şagirdlər təbiətə həsr edilmiş şeirlər söyləyib, mahnılar zümzümə edərək öz bilik və bacarıqlarını tətbiq ediblər. Dərsin sonunda belə qənaət hasil olub ki, bu tipli dərslər çağdaş zamanımızda gənc nəslin vətənpərvərlik ruhunda, torpaq, yurd sevgisi ilə böyüməsinə, əsl vətəndaş kimi tərbiyəsinə geniş imkanlar yaradır. Ən ümdəsi isə ölkə rəhbərinin imzaladığı qanun, sərəncamlara diqqət və qayğını artırır.

 23 aprel "Oxu günü" münasibətilə 5 "B" sinfinin şagirdlərinin iştirakı və Azərbaycan dili və ədəbiyyat müəllimi Təranə Bağırovanın təşkilatçılığı ilə Dədə Qorqud parkında Amerikalı uşaq yazıçısı Eleanor Porterin "Polyanna" əsəri müzakirə olunub. Müəllim şagirdlərə bildirib ki, "Polyanna" bir uşaq ədəbiyyatı nümunəsi olaraq uşaqların, xüsusən, də qızların sevimli əsərinə çevrilib. Əsər çap olunandan sonra qəhrəmanı Polyannanı ədəbiyyatçılar ən nikbin ədəbi personaj adlandırıblar. Əslində bizim bildiyimiz "hər şərdə bir xeyir var" məntiqinin daha əyləncəli və asan anlaşıla bilən halı əsərdə işlənib. Bu oyun sayəsində Polyanna həmişə şəndir, gümrahdır, həyatcanlıdır. Eyni zamanda bu əhval-ruhiyəsi ilə ətrafındakılara da sevinc qaynağıdır. Şagirdlər Polyana obrazına münasibət bildiriblər. Əsər şagirdlər tərəfindən səhnələşdirilib. Polyana və qulluqçu Nensi obrazı canlandırılıb. Şagirdlər müzakirədə fəal iştirak ediblər

Məktəbdə 23 aprel Oxu günü münasibətilə Azərbaycan dili və ədəbiyyat və ibtidai sinif müəllimlərinin təşkilatçılığı ilə tədbir keçirilib.Tədbirdə çıxış edən məktəbin direktoru Kəmalə Qədirova bildirib ki, şagirdlərin mütaliə və müstəqil öyrənmə bacarıqlarının təkmilləşdirilməsi, onlarda tənqidi, məntiqi və yaradıcı təfəkkürün inkişafı, rəy bildirmə mədəniyyətinin formalaşdırılması məqsədilə mütaliənin keçirilməsi vacibdir. Kitablar şagirdləri zəngin mənəvi zövqə malik bir insan kimi tərbiyə edir, öz xalqının mübarizələrlə zəngin tarixi keçmişinə dərindən bələd olmasına imkan yaradır. Sonra şagirdlər Ulu Öndər Heydər Əliyevin məktəb, təhsil, məktəbin hər insanın həyatında rolu haqqında fikirlərini dinləyiblər. Tədbirdə şagirdlər mütaliə etdikləri əsərlərdən kiçik parçalar söyləyib , səhnəciklər təqdim ediblər. Dahi söz ustadlarının kitab haqqında söylədiyi dəyərli fikirləri söyəyiblər. Eyni zamanda Azərbaycan şairlərinin söz xəzinəsindən gözəl şeirlər ifa ediblər. Şagirdlər hazırladıqları kompozisiyalarla mütaliəyə,kitaba olan sevgilərini bir daha əyani şəkildə göstəriblər. Tədbir böyük ruh yüksəkliyi ilə sona çatıb.