119 №-Lİ TAM ORTA MƏKTƏB

   “Dahi Azərbaycan şairi Məhəmməd Füzulinin 530 illiyinin qeyd edilməsi haqqında” Azərbaycan Respublikası Prezidentinin 25 yanvar 2024-cü il tarixli sərəncamının icrasını təmin etmək məqsədilə 18 aprel 2024-cü il tarixində D.Cəbrayılov adına 119 nömrəli tam orta məktəbin kitabxanasında “Dahi Füzuli” adlı dəyirmi masa keçirildi. İlk olaraq kitabxana müdiri çıxış edərək bildirdi ki, Füzuli ədəbi-bədii dilimizi yüksəklərə qaldırmış, klassik Azərbaycan, digər türk xalqlarının poeziyasına qüvvətli təsir göstərmiş, ədəbi məktəb yaratmışdır.

Sonda şagirdlər şairin həyat və yaradıcılığı, poeziyası haqqında məlumat verərək, qəzəllərini oxuyaraq müzakirə etdilər.

   18 aprel 2024-cü il tarixində D.Cəbrayılov adına 119 nömrəli tam orta məktəbin psixoloqu Natəvan Əliyeva tərəfindən “Erkən nikah və qohumlararası nikahın fəsadları” adlı maarifləndirici söhbət aparıldı. Söhbətin keçirilməsində əsas məqsəd erkən nikah və qohumlararası nikahın dünyada və ölkəmizdə doğurduğu fəsadlar, cəmiyyətə vurduğu ziyanlar haqqında şagirdlərə məlumat verməkdən ibarət olmuşdur. Psixoloq qeyd etdi ki, erkən nikahlar gələcək nəsillərin sağlamlığını təhlükəyə atır, eyni zamanda sağlamlıq imkanları məhdud uşaqların dünyaya gəlməsinə səbəb olur.

Sonda mövzu ilə bağlı şagirdlər də fikirlərini bildirərək geniş müzakirə apardılar.

   2024-cü ilin "Yaşıl dünya naminə həmrəylik ili" elan edilməsi ilə bağlı tədbirlər planına əsasən 15 aprel 2024-cü il tarixində D.Cəbrayılov adına 119 nömrəli tam orta məktəbin azərbaycan dili, ədəbiyyat müəllimi Nərgiz Əlisoy tərəfindən VII^C sinfində "Dünya ədəbiyyatının görkəmli nümayəndəsi Nizami Gəncəvinin əsərlərində ətraf mühitin qorunması" mövzusunda öyrədici-didaktik dərs təşkil olundu. Tədris prosesində şagirdlər qruplara bölünərək şairin "Xəmsə"sinə daxil olan poemalardan götürülmüş nümunələr əsasında layihə hazırladılar. Daha sonra qrup üzvləri tərəfindən nümunələrlə təbiətin qorunmasına yönəlmiş fikirlər səsləndirildi. Ətraf mühiti qorumağın vacibliyi, təbiətin həyatımızdakı mühüm yeri barədə birgə müzakirə aparıldı.

   D.Cəbrayılov adına 119 nömrəli tam orta məktəbin kitabxanasında “Beynəlxalq Uşaq kitabı günü” ilə əlaqədar olaraq III^B sinif şagirdləri ilə Azərbaycan və dünya xalq nağıllarının müzakirəsi keçirildi. Müzakirənin keçirilməsində məqsəd uşaqların intellektual inkişafında kitabın rolunu yüksəltmək, ona sevgi aşılamaq, həmçinin diqqəti uşaq kitablarının nəşrinə yönəltməkdir. Kitabxana müdiri uşaqların tərbiyəsində kitabların xüsusi yer tutduğunu vurğulayaraq qeyd etdi ki, kitablar uşaqları mənəvi zövqə malik bir insan kimi formalaşmasında mühüm rol oynayır.

Sonda şagirdlər nağıl qəhrəmanlarının obrazlarından ibarət çəkdikləri rəsmləri nümayiş etdirdilər.

   03.04.2024-cü il tarixində D.Cəbrayılov adına 119 nömrəli tam orta məktəbin biologiya müəllimi, tibb bacısı və psixoloq tərəfindən IX sinif qız şagirdləri ilə Reproduktiv sağlamlıq çərçivəsində “Yeniyetmələrin sirləri” mövzusunda məşğələ keçirildi. Məşğələdə şagirdlərə yeniyetməlik dövrünün özəlliklərindən, orqanizmdə baş verən dəyişikliklərdən, hormonal statusun formalaşmasından məlumat verildi. Daha sonra cinsi yetkinlik dövründə qızların orqanizmində baş verən dəyişikliklər, qadın orqanizminin quruluşu, qadın gigiyenası və gigiyenik vasitələrin düzgün seçilməsi və istifadəsi haqqında söhbət edildi.

Sonda mövzu üzrə slaydlar nümayiş olundu, şagirdləri maraqlandıran suallar cavablandırıldı.